Rəsmi Bakı 15 sentyabrı niyə bayram etmir?

1918-ci il sentyabrın 15-də Bakının rus-erməni hərbi birliklərindən azad edilməsinin 94-cü ildönümü ilə bağlı İctimai Palata rəhbərliyi Şəhidlər Xiyabanını və türk məzarlığını ziyarət edib.

AXCP sədri Əli Kərimli Bakının 94 il öncə azad olunmasını hələ o zaman Cümhuriyyət rəhbəri Məhəmməd Əmin Rəsulzadənin “28 may istiqlalından sonra ən önəmli hadisə” adlandırdığını xatırladıb. Sovet dönəminin ilk illərində də Bakını Azərbaycandan ayıraraq Rusiyaya tabe etmək cəhdləri olduğu xatırladılıb. Bu qələbənin qazanılması Cümhuriyyət rəhbərliyinin düzgün siyasi kursu və türk əsgərinin fədailiyi ilə əlaqələndirilib. Mövcud Azərbaycan iqtidarının bu günə önəm verməməsi kəskin tənqid edilib. İndiki iqtidarın bu günü rəsmi bayram etməməsi M.Rəsulzadə və Əbülfəz Elçibəy yoluna qısqanclığının və Türkiyəyə qeyri-səmimi münasibətinin nəticəsi kimi dəyərləndirilib. “Bizlərsə həmişə buraya gələrək vəfa borcumuzu yerinə yetirəcək, Azərbaycan üçün şəhid olaraq əbədi bu torpaqlarda uyuyan şəhidlərə ehtiramımızı ifadə edəcəyik”, - deyə AXCP sədri qeyd edib.

Müsavat başqanı İsa Qəmbər artıq dünyanın siyasi gündəminə “parçalanmış Azərbaycan məsələsi”nin daxil olmasını xatırladıb. Bütöv Azərbaycan məsələsinin dünya siyasətinin gündəminə gəlməsi vurğulanıb. Bakının azad olunmasını xalqın qələbə tarixi kimi dəyərləndirən Müsavat başqanı Şəhidlər Xiyabanına erməni işğalında olan torpaqların azad olunması şərəfinə gəlmək arzusunu ifadə edib. Bunun üçün bütün xalqın toparlanmasının vacibliyini yada salıb. Bakının azad olunmasında türk əsgərinin fədakarlığını yada salan İ.Qəmbər bu şəhidlərin öz qanları ilə heç zaman sarsılmayacaq Azərbaycan-Türkiyə abidəsi yaratdığını xüsusi qeyd edib.

Daha sonra İctimai Palata üzvləri Şəhidlər Xiyabanını ziyarət ediblər.

Elə bu gün bir qrup türk və azərbaycanlı gənc türk məzarlığını ziyarətə gəlib. Gənclər Xiyabanda İctimai Palata üzvlərilə qarşılaşdıqda “Şəhidlər ölməz-Vətən bölünməz” şüarı səsləndiriblər və bir-birlərini alqışlayıblar. Türkiyədə Azərbaycan diasporunun rəhbərlərindən Teymur Səlcuq Türkiyə-Azərbaycan dostluğunun kökündə hökumətlər yox, xalqlar özü durduğu üçün bu dostluğun əbədi olacağına şübhə etmədiyini söyləyib. -05C-