Şeyx islam əleyhinə filmi pisləyib

Şeyx Allahşükür Paşazadə “Müsəlmanların məsumiyyəti” filminin bir sıra müsəlman ölkələrində səbəb olduğu mənfi proseslərlə bağlı bəyanatla çıxış edib.

Bəyanatda deyilir ki, ABŞ vətəndaşı, rejissor Sem Bacil tərəfindən çəkilmiş bu lent islamofobiyanın yeni təzahürüdür, filmdə Məhəmməd Peyğəmbər təhqiredici şəkildə əks olunub. “Bu, tamamilə ədalətli olaraq, islam dünyasının narazılığına səbəb olub, Liviyada Amerika səfirliyinin əməkdaşlarının öldürülməsi bunun acı sonu olub. Müsəlman dünyasını bürüyən etirazlar və mitinqlər dalğası iğtişaşlara yol açıb, təqsirsiz insanların ölümünə səbəb olub”, deyə sənəddə bildirilir.

“İnsan hüquqları uğrunda mübarizə aparan və özünü demokratiyanın dayağı hesab edən bəzi qərb ölkələri əslində demokratik prinsipləri tapdalayır, müsəlman cəmiyyətlərinə münasibətdə aqressiv və rasist siyasət nümayiş etdirir.

Quran hərbi qulluqçuların hədəfinə çevrilir, başabəla pastorlar tərəfindən yandırır və nəhayət, Peyğəmbəri təhqir edən “Müsəlmanların məsumiyyəti” filmi faciəvi nəticələrə gətirib çıxarır.

Bütün bunlar dünyada humanizmin, ədalətin və qardaşlığın qələbəsinə olan ümidləri zəiflədir, nifrətə və dini zəmində qarşıdurmalara yol açır. İslam dininə qarşı yönəlmiş bu həddindən artıq məsuliyyətsiz addımları sülhü dağıtmaq və qarşıdurmanı dərinləşdirmək məqsədi daşıyan əməl, konfessiyalararası və millətlərarası dialoqa zərbə kimi qiymətləndiririk. Müsəlmanların tamamilə ədalətli qəzəbinə səbəb olanson hadisələr müstəsna olaraq sivilizasiyaların qarşıdurmasına yönəlmiş sabitliyi pozan amildir”, deyə bəyanatda bildirilir.

“Sem Bacil, Terri Cons və son günlər baş verən hadisələrin digər təqsirkarlarının və millətlərarası və konfessiyalararası düşmənçiliyi qızışdıran hər kəsin məhkəmə qarşısına çıxarılmasını tələb edirik. Həmçinin, onların zərərli əməllərinə hüquqi qiymət verilməsini tələb edirik”, deyə bəyanatda qeyd edilir. -02D-