Mətbuat-Monitorinq 16.04.13

“Azadlıq” qəzeti dövlət başçısı İlham Əliyevin bazar günü keçirdiyi Nazirlər Kabinetinin toplantısını “hakimiyyətinin taleyindən ciddi narahat olması” kimi şərh edir.

Bir neçə gün öncə Lənkəran rayon polis şöbəsində intihara cəhd etdiyi bildirilən Camil Babayev xəstəxanada vəfat edib, yaxınları isə onun polis şöbəsində işgəncəyə məruz qoyulduğunu yazır.

Nəqliyyat Departamenti əməkdaşlarının sürücülərə qarşı qoçuluğu davam edir, bu “rəsmi qoçular” sürücü Məzahir Mehmanovun maşınını əlindən alıblar.

Dövlət başçısı İlham Əliyevin Avropa siyasilərini “gələcək nəsillərin cibinə girməkdə” ittiham etməsinə ekspertlər “neft gəlirlərinin 70%-ni xərcləyən ölkənin kimisə cibə girməkdə ittihamı məntiqsizdir” şərhini veriblər.

İlahiyyatçı Taleh Bağırovun cinayət işində deputat Zeynəb Xanlarova adının hallanmasına etiraz edib, iqtidarın “ideoloqu” Əli Həsənov isə bu etiraza “Zeynəb xanım mahir sənətkardır, amma yetkin siyasətçi deyil” şərhini verib. 

Dindarları müxalifətlə bir cəbhədə birləşməyə çağıran məktub yazdığına görə həbsdə olan ruhani Abgül Süleymanov “karsa” salınıb.

“Yeni Müsavat”  yazır ki, Butalife.com saytı “Azərbaycanda prezident seçkilərindən sonra kimi prezident görmək istəyirsiniz?” sualı ilə keçirdiyi sorğuda ardıcıllıq belə olub:  Mehriban Əliyeva (42%), İsa Qəmbər (15%), İlham Əliyev (12%), İlqar Məmmədov (8%) olub. Sonrakı yerlərdə Eldar Namazov, Ayaz Mütəllibov, Əli Kərimli və başqaları gəlir.   

Qəzetin iddiasına görə, sorğunu keçirən sosial şəbəkə fövqalədə hallar naziri Kəmaləddin Heydərovun çevrəsinə bağlıdır. 

Kənd təsərrüfatı naziri İsmət Abbasovun oğlunun Londonda aldığı mülkdən sonra nazirlikdə audit yoxlamalarının başlandığı bildirilir. Nazir oğlu hakim elitaya daxil  deyil və ev icazəsiz alınıb. Qəzet Azərbaycan hakimiyyətinin yüksək vəzifəli məmurlarının Londonun bahalı rayonlarındakı evlərindən də yazır. 

İsmayıllı hadisələri ilə bağlı Xəyal Şaranov ölüm aclığına başlayıb. İsmayıllı hadisələri ilə bağlı ReAL Hərəkatının lideri İlqar Məmmədov, Müsavat Partiyasının başqan müavini Tofiq Yaqublu və daha 16 nəfər həbs edilib. 

Prezident Administrasiyasının şöbə müdiri Zeynəb Xanlarovanın son açıqlamalarına münasibət bildirib. “Müxalifət Zeynəb Xanlarovanı öz tərəfinə çəkə bilməyəcək. Zeynəb xanım mahir sənətkardır, amma yetkin siyasətçi deyil, onu öz tərəfimizdə görürük”. 

Qəzet “Hacı Taleh Bağırovu şeyxin tutdurduğu iddiası səslənir” başlıqlı yazı dərc edib. Qəzetin istinad etdiyi mənbə deyib ki, Bağırovun dostları həbsin əsas səbəbkarı kimi şeyxülislam Hacı Allahşükür Paşazadəni gördüklərini, sifarişin QMİ-dən gəldiyinə inandığını deyib. 

“Bizim Yol” Rusiyanın Azərbaycanla sərhəddə hərbi təlimlərə başladığını yazıb. Rusiyanın Şimali Qafqaz, Abxaziya və Ermənistandakı ordu hissələri sınaqdan keçirilir. 

Qəzet “Qaçqınkom”da büdcə oğurluğunun şok gizlinləri” başlıqlı yazıda köçkünlərə ayrılan pulların rəhbər şəxslər tərəfindən talandığını yazır. 

Hesablama Palatası “Qaçqınkom”da apardığı yoxlama zamanı  283,2 min manat büdcə “yeyintisi”, 267 min manat isə vergidən yayınma halı aşkarlayıb. Buna görə, verilən cəza “şiddətli töhmət” olub. 

“Ekspress” keçmiş iqtisadi inkişaf naziri Fərhad Əliyevin məşhur “Hamı yerli mal alsın, xeyir vətənə qalsın” şüarı adı altında məqalə dərc edib. İstehlakçılar xarici malların keyfiyyətindən şikayətçidir. “Xaricdən gətitilən bir çox ərzaq malları dərman dadı verir”. 

İmişli Rayon İcra Hakimiyyətinin başçısı Vilyam Hacıyev Müstəqil İnformasiya Agentliyini məhkəməyə verib. Agentlik İcra Hakimiyyəti başçısının biznesmenlərə borclu olduğunu yazıb. İcra başçısı agentlikdən 100 manat tələb edir. 

Qəzet “Cındır bazarı”ndan reportaj” yazısını çap edib. Reportajda bazarda köhnə mallarla yanaşı hər cür xəstəliyin satıldığı deyilir. Köhnə malların satışına sanitar nəzarəti yoxdur. Satılan malların mənbəyi məlum deyil. Hansı xəstə insan  geyinib və ya istifadə tdiib. 

“Bakı xəbər” Qarabağda sülhməramlı qüvvələrin yerləşdirilməsinin yenidən aktuallaşmasından yazır. “İran sərhədləri  yaxınlığında nə Rusiyanın, nə də NATO qüvvələrini görmək istəmir”. 

Aprelin 15-24-də Rumıniyanın Cincu şəhərində Amerika-Azərbaycan ikitərəfli əməkdaşlıq planına uyğun olaraq hərbi təlm keçirilir.