Hökumət neft pullarını səxavətlə xərcləyir

 2013-cü ilin I rübündə büdcə mədaxilinin 61%-i (2 840 mln manat) Neft Fondundan transfertlər olub. Amma aprelin 14-də hökumətin iclasında vergilər naziri Fazil Məmmədov iqtisadi artım tendensiyasını hökumətin ayağına yazıb. 

Büdcə gəlirləri 4 670 mln manat (+31%) xərclər 4 515 mln manat olub. Xərclərin əsas hissəsi (1 913 mln manat və ya 42,3%) dövlət investisiya layihələrinə gedib, dörddə biri (1 164 mln manat) sosial məsələlərin həllinə yönəldilib: əmək haqları, pensiyalar, müavinətlər, dərman və ərzaq alınması. Hökumət investisiya aktivliyini böyük templə artırır. Dövlət büdcəsi xətti ilə investisiya məbləği əvvəlki illərin birinci rübünün ümumi göstəricisini (21,5 mlrd mant) 27,5% keçib. Müstəqil ictimai təşkilatlar bu vəsaitlərin qeyri-şəffaf xərcləndiyini bildirir. Məsələn, Qusarda dağ-xizək kompleksinə $1 mlrd-dan çox vəsait ayrılıb.  

Nazir deyib ki, büdcə siyasəti regionlarda iqtisadi artıma müsbət təsir edib. Son 10 ildə regionlardan büdcəyə mədaxil 11,8 dəfə artıb. Amma bu ilin ötən dövrü üçün rəqəm açıqlanmayıb. Yeni sahibkarlıq subyektlərinin üçdə ikisi regionlarda fəaliyyət göstərir. 

Nazir hesab edir ki, fiziki şəxslərin gəlir vergisinin azaldılması əhalinin rifahına müsbət təsir edəcək. Bu ilin yanvarından gəlir vergisinin 14 faiz dərəcə ilə tutulan hissəsi 2000 manatdan 2500 manata qədər qaldırılıb, verginin yuxarı həddi isə 30 faizdən 25 faizə endirilib. 

Yoxlamalar nəticəsində son 9 ayda 56 mindən artıq vergi ödəyicisi üzrə 190 mindən yuxarı rəsmiləşdirilməmiş iş yerləri rəsmiləşdirilib. Maraqlıdır ki, 2012-ci ildə özəl sektorda muzdlu işçilərin sayı 550 mini keçməyib. Başqa sözlə, hökumət uzun illər ölkədə qeyri-leqal məşğulluğu “sezməyib”. 08D