Mətbuat-Monitorinq 16.05.14

Rəsmi qəzetlər dövlət başçısı İlham Əliyevin Bakı Beynəlxalq Multikulturalizm Mərkəzinin yaradılması haqda fərmanının, Yardımlı-Deman-Arvana yolunun tikintisilə bağlı 4,3 milyon manat ayrılması, “Azərbaycan” Dövlət Nəşriyyatı, “Azərnəşr” əməkdaşlarına fəxri adların verilməsi, bu qururmların əməkdaşlarının bir qrupunun “Tərəqqi” medalı ilə təltif olunmaları haqda sərəncamların, “Dəniz limanları haqqında” qanunun mətnlərini dərc ediblər.

“Azadlıq” qəzeti DİN-in idarə rəisilə polislər arasında insidenti yoluna qoymaqda çətinlik çəkən nazir Ramil Usubovun çətin duruma düşməsini ilk səhifəyə çıxarıb.

Bir sıra müxalifət qüvvələrinin siyasi məhbuslara dəstək aksiyası keçirməsilə bağlı müraciətinə Bakı meriyası təşkilatçıların partiya mənsubiyyətlərini göstərməmələrini “əsas” gətirərək rədd cavabı verib.

Jurnalist Pərviz Həşimlinin saxta ittihamlar əsasında 8 il azadlıqdan məhrum edilməsini ictimaiyyət təmsilçiləri hakimiyyətin qisas alması kimi şərh edirlər. 

Bakıda “nurçu”ların Yasamal rayonundakı yığışdıqları ev sökülür, onlar sökülən evin yaxınlığındakı yeni inşa edilən binaya köçəcəklər.

Qəzet Beyləqan hərbi birləşməsinin keçmiş komandaın general-mayor Mahmud Həmzəyevin həbsə alındığını yazır.

Ekspertlər Bakının mərkəzində yerləşən ali məktəblərin kənara çıxarılacağı haqda rəsmi açıqlamaların hər hansı xoş niyyətlə yox, oliqarx məmurların biznes maraqları ilə bağlı olduğunu bəyan ediblər.

“Ekspress” qəzeti general-mayor Mahmud Həmzəyevin həbsini ilk səhifəyə çıxarıb.

Qəzet ekspertlərə istinadən Bakı-Tbilisi-Ərzurum qaz kəmərinin əsaslı xərclərinin bahalaşaraq 1,25 milyard dollara çatacağı barədə xəbərdarlı1 edir.

Güney Azərbaycan fəalları Urmu gölünün 95%-nin quruduğunu, yaxın 2-3 gündə qalan hissənin də quruyacağı bəyanatı yayıblar.

“Novoe Vremya” qəzeti general-mayor Elbrus Orucovun Müdafiə Nazirliyində Operativ Əməliyyat İdarəsinə rəis təyin olunmasına “Şuşanı təslim edən general Müdafiə Nazirliyinin rəhbərliyində” mövqeyini ifadə edir.

Qəzet Kiyevdə Azərbaycan diasporunun rəhbəri Rövşən Tağıyevə sui-qəsdi Ukrayna daxili işlər naziri Arsen Avakovun Ukraynanı “təmizləməyi” davam etdirməsi, növbənin azərbaycanlılara çatması kimi şərh edir.

“Bizim yol”  keçmiş ordu komandanı Mahmud Həmzəyevin həbsini Silahlı Qüvvələrdə “balyoz əməliyyatı” keçirilməsi kimi dəyərləndirir.

“Yeni Müsavat”  ortada faktlar olduğöu üçün qəzetin əməkdaşı Fərahim İlqaroğlunun döyülməsini nazir Ziya Məmmədovun qardaşı oğlu Aynar Məmmədovun sifariş etdiyini polisin gizlədə bilməyəcəyi haqda xəbəri önə çəkib.

Hakimlik fəaliyyətində yol verdiyi ciddi nöqsanlara görə Goranboy Rayon Məhkəməsinin sədri Vidadi Nəsirov, Gəncə şəhər İnzibati-İqtisadi Məhkəməsinin hakimləri Cavad İbrahimov və Rafiq Məmmədovun səlahiyyətinə xitam verilib.

Gömrük yüklərinin bu ilin sentyabrndan ASAN xidməti vasitəsilə bəyan olunacağını qəzet dövlət başçısından gömrük mafiyasına qarşı “şah gedişi” adlandırır.