Mətbuat-Monitorinq 17.09.14

Rəsmi qəzetlər dövlət başçısı İlham Əliyevin Almaniya Bundestaqının fraksiya sədrinin müavini Andreas Şokenhofu qəbul etməsi, Rəfiq Zəka Xəndanın 75 illik yubileyinin qeyd olunması ilə bağlı sərəncamın mətnini ilk səhifələrdə yerləşdiriblər. 

“Azadlıq” qəzeti həbsdə olan hüquq müdafiəçisi Leyla Yunusa kamerada qeyri-insani rəftar göstərən dustaq Nuriyyə Hüseynovaya “kömək” üçün daha bir dustağın göndərildiyini yazır.

Azərbaycanda insan haqları durumunun Avropa İttifaqında təkrar müzakirəyə çıxarılmasını qəzet rəsmi Bakıya siyasi təzyiq kimi dəyərləndirir.

Deputat Qüdrət Həsənquliyev hakimiyyətə beynəlxalq hüquq- müdafiə təşkilatları ilə qarşıdurmaya getməmək, siyasi məhbusları azad etmək çağırışı edib.

Sumqayıt Dövlət Universitetinin prorektoru Nizami Həsənov universitetin dünyəvi təhsil ocağı olmasını “əsas” gətirərək bir neçə hicablı tələbəni dərslərə buraxmayıb.

Ekspertlər və siyasilər partiyalara ianə məhdudiyyətini rəsmi Bakının siyasi partiyaların fəaliyyətini dayandırmaq səyi kimi dəyərləndirirlər.

Dünyanın 700 nüfuzlu universiteti sırasına Azərbaycandan yalnız “Qafqaz” Universitetinin adı düşüb, Azərbaycanın dövlət universitetlərindən heç biri bu sırada yer ala bilməyib.

 Dillər Universitetindəki maliyyə pozuntuları ilə bağlı rektor Səməd Seyidovun prokurorluqda dindirildiyini yazan qəzet onun məhkəmə qarşısına çıxa bilməsini də istisna etmir. 

“Ekspress”  Fransa prezidenti Ollandın vasitəçiliyi ilə Azərbaycan və Ermənistan dövlət başçılarının oktyabrda bir araya gələcəyini önə çəkib.

Parlamentin komitə sədri Hadı Rəcəbli ölkədə yas mərasimlərinin qanunla tənzimlənməsinin mümkün olmayacağını bəyan edib.

“Exo”  Azərbaycanın İŞİD terrorçu qruplaşmasına qarşı mübarizə koalisiyasına qoşulub- qoşulmayacağı məsələsini ilk səhifədə yerləşdirib.

Şadlıq saraylarını “xəlvəti toy iqtisadiyyatı” adlandıran ekspetlər Azərbaycanın bu şadlıq saraylarından imtina etməsini bəyan edirlər.

Qəzet 2007-12-ci illərdə pullu xidmətin həcminin 2 dəfə artaraq 2,3248 mlrd.manatdan 5,828 milrd manata yüksəldiyini nəzərə çatdırır.

“Novoe Vremya” ATƏT-in Minsk Qrupunun ABŞ-dan olan həmsədri  Uorlikin Qarabağ probleminin tənzimlənməsilə bağlı Yerevanda əsaslı bir söz deməməsinə “Ceyms Uorlikdən daha nə gözləmək olar?” narazı mövqeyini ilk səhifəyə çıxarıb.

Ölkədə partiyalarla bağlı qanunların sərtləşdirilməsinə qəzet “yenə də qanunlar sərtləşdirilir, QHT-lərdən başladılar, artıq partiyalara çatıblar” mövqeyini sərgiləyir.

“Bizim yol”  işindən azad edilən Gəncə şəhər Nizami rayonunun icra başçısı Məharət Mustafayevin barəsində araşdırmanın başlanmasını ilk plana çıxarıb.

“Yeni Müsavat” qlobal güclərin savaşında dünyanı yenidən bölmək üçün önə çıxan referendumlar prosesini “qorxulu mərhələ” sayaraq ilk plana çıxarır və Qarabağ münaqişəsi fonunda bunu “Azərbaycana referendum təhdidi” adlandırır.

Bakı meriyası Müsavat Partiyasının qurultayını  Əmircandakı Mədəniyyət Evində keçirməyə razılıq versə də Mədəniyyət Evi “fantastik məbləğ” istədiyi üçün partiya qururltayın keçirilməsindən ötrü şadlıq evləri ilə də danışıqlar aparır.

Qərb-Rusiya rəqabətində Rusiyanı çökdürmək üçün dünya bazarında neftin qiymətinin 85 dollara endirilməsi kimi planın olduğunu yazan qəzet bu halda Azərbaycan iqtisadiyyatının kollaps riskilə üz-üzə qalacağı barədə xəbərdarlıq edir.

Ölkənin təhsil sistemində dərs deyən 30 min nəfərlik personalın cəmi 3600 nəfərinin kişi olduğunu yazan qəzet bunu “qadınlaşan Azərbaycan təhsili” adlandırır.