Prokurorluq jurnalistə hücum edən BDU mühafizəçisini müdafiə etdi

Yasamal rayon Prokurorluğu məşhur jurnalist, Turan agentliyinin və “Amerikanın səsi” radiosunun müxbiri Tapdıq Fərhadoğlunun döyülməsi faktı üzrə cinayət işi açmaqdan imtina edib.

İnsident fevralın 20-də tələbələrin Bakı Dövlət Universiteti qarşısında etiraz aksiyasının işıqlandırılması zamanı baş verib.

Jurnalist prokurorluğun ona sentyabrın `12-də təqdim edilmiş qərarından məhkəməyə şikayət vermək niyyətindədir.

Xatırladaq ki, fevralın 20-də BDU-nun mühafizə xidmətinin rəhbəri Mahir Höcətov tələbələrin etiraz aksiyasını çəkən jurnalistin kürəyinə və başına arxadan bir neçə təpik və yumruq vurub.

Jurnalistin hüquqi nümayəndəsi Ruslan Əliyev bildirib ki, prokurorluğun araşdırması obyektiv deyildi və cinayət işi açılmasından imtina qərarı əsassızdır.

Araşdırma zamanı iki dəfə ekspertiza təyin edilib. Onlardan biri mart ayında Fərhadoğluna zərbə endirildiyini təsdiq edib. İnsidentdən bir neçə gün sonra jurnalistin vəziyyəti kəskin şəkildə pisləşməyə başlayıb – ayağında və kürəyindəki ağrılar çoxalıb.

Aprelin əvvəllərində onun vəziyyəti kəskin şəkildə pisləşib və dərmanlar artıq təsir etməməyə başlayıb. Həkimlər onurğa diskində sürüşmə olduğunu müəyyən ediblər və aprelin 10-da Fərhadoğlunun onurğasında çətin əməliyyat həyata keçirilib, bundan sonra jurnalist hələ də tam yaxşılaşmayıb.

Əməliyyatdan sonra jurnalist təkrarən prokurorluğa müraciət edib. MedicalPlaza-nın həkimi (əməliyyatın keçirildiyi yer) yetirilmiş xəsarətin ağırlaşdırıcı fakt ola biləcəyi barədə rəy versə də, ekspertiza bunu “kiçik ehtimal” hesab edib.

Maraqlıdır ki, cinayət işi açılmasından imtina haqqında qərar hələ mayın 10-da qəbul edilib, bir halda ki, ikinci ekspertizanın rəyi 9 iyun tarixlidir.

Bütün bu müddət ərzində müstəntiq Mübariz Əsədov jurnalistin sorğularına cavabda qərar qəbul edilmədiyini bildirib. Yalnız keçən həftə o, cinayət işi açılmasından imtina haqqında qərar qəbul edildiyini bildirib.

Bu zaman prokurorluq jurnalistə qarşı təkcə Höcətov deyil, BDU-nun mühafizə xidmətinin digər əməkdaşı tərəfindən də güc tətbiq edildiyini təsdiq edən videomateriallara məhəl qoymayıb. Həmçinin, jurnalistin döyülməsinin çoxsaylı şahidləri dindirilməyib.

Prokurorluğun qərarından məhkəməyə şikayət veriləcək. Jurnalist özü Azərbaycan hüquq-mühafizə orqanları hüquqlarını bərpa etmədiyi təqdirdə işi Avropa İnsan Hüquqları Məhkəməsinə qədər çatdırmaq niyyətindədir. -06В-