Mətbuat-monitorinq 17.10.15

Rəsmi qəzetlər dövlət başçısı İlham Əliyevin MDB dövlət başçılarının iclasına qatılması haqda xəbəri ilk səhifələrdə yerləşdiriblər. 

“Azadlıq” qəzeti hökumətin iqtisadi inkişaf haqqında iddialarını rəsmi rəqəmlərin alt-üst etdiyini yazaraq, bunu “ölkə iqtisadiyyatının fəlakətli həddə olması” kimi dəyərləndirərək manjetə çıxarıb.

Qəzet ölkənin ictimai-siyasi və iqtisadi həyatı, beynəlxalq münasibətlərilə bağlı təhlillərə geniş yer verib.

AŞPA prezidenti Ann Brasser İlham Əliyevə məktubunda Azərbaycanda ifadə və söz azadlığının, plüralizmin ciddi təhlükə altında olduğunu bildirir.

Rusiyanın Xəzər dənizindən raket zərbələri üçün istifadə etdiyinə görə Qazaxıstan hava yolları Azərbaycana, Gürcüstana və Türkiyəyə uçuşların yolunu dəyişdirir.

Dövlət başçısının sahibkarları müdafiə çıxışından sonra özəl qurumlara qarşı yoxlamaların dayandırılmasını qəzet  dövlət qurumlarının “10 illər boyu reketliklə məşğul olmasının etirafı” kimi dəyərləndirir. 

ABŞ senatoru Dik Durbin rəsmi Bakını illər boyu müstəqil ictimai birliklərə və mətbuata qarşı xüsusilə aqressiv davranmaqda ittiham edib.

Ölkə gəlirlərinin azaldığı indiki vaxtda hökumətin vergi dərəcəsini artırmağı ekspertlər “sahibkarların qara günlərinin başlaması” kimi şərh edirlər.

Qəzet statistik rəqəmlərə isnadən keçən il ilə müqayisədə bu il neft satışından gəlirlərin 8 milyard dollar azaldığını nəzərə çatdırır.

Ekspertlər rəsmi rəqəmlərə isnadən xarici iqtisadi dövriyyənin 36%, ixracın isə 47% azalmasını “xarici ticarətdə fantastik azalma” kimi təqdim edirlər.

Qəzet yazır ki, dövriyyədə qazana bilməyən saibkarlar mal-məhsulun qiymətlərini qaldrmağa məcbur olurlar.

Keçən ilə müqayiəsədə bu il 25. 069 ədəd az avtomobil gətirilməsi “avtomobil idxalının çökməsi” kimi qiymətləndirilir.  

“Ekspress” qəzeti Rusiyanın Xəzər dənizindən raket zərbələri üçün istifadə etməsilə bağlı Qazaxıstanın bəzi aviareyslərin yolunu dəyişdirməsini “rus raketlərinin Xəzər səmasını qapatması” kimi diqqət mərkəzinə çəkib.

“Novoe Vremya” qəzeti Səudiyyə Ərəbistanının neftin qiymətinin aşağı salmasını “Azərbaycanın ayağını tapdaması” kimi ön plana çıxarıb.

“Bizim yol” qəzeti Vergilər Nazirliyinin cərimələri 5 qat artırmasını “fantastik cərimə” xəbəri kimi ilk səhifəyə yerləşdirib.

Qəzet parkinqlər və otellərdən bələdiyyələrə çatası vəsaitləri icra orqanlarının mənimsədiyini bildirir.

“Yeni Müsavat” qəzeti paytaxtda brend mağazaların və s. obyektlərin kütləvi şəkildə bağlanmasını “iqtisadi böhranın zənginləri təlaşa salması, varlıların Bakıdan qaçması” kimi dəyərləndirərək ilk səhifəyə çıxarıb.

Ticarət və ictimai iaşə sahəsində hüquqpozmalara görə cərimələrin miqdarı 5 dəfə artırılır.

Hacı İbrahim Nehrəmlinin sahibi olduğu “Avesta” şirkətinin işçiləri 7 aydır ki, maaşlarını ala bilmədikləri barədə şikayət ediblər.

Dövlət başçısının fərmanı ilə Nəqliyyat Nazirliyinin bəzi funksiyaları yol polisinə tabe edildikdən sonra sürücülərə qarşı “qoçuluq” edən nəqliyyat müfəttişləri artıq Bakı küçələrində görünmürlər.