Mətbuat-Monitorinq 18.01.13

Rəsmi qəzetlər dövlət başçısı İlham Əliyevin ABŞ-ın müdafiə nazirinin baş müşavirinin başçılıq etdiyi nümayəndə heyətini qəbul etməsi, I Avropa Oyunlarının 2015-ci ildə Bakıda keçirilməsilə bağlı Təşkilat Komitəsinin yaradılması haqda sərəncam imzalamasını ilk səhifələrə çıxarıblar. 

Bu qəzetlər fəal vətəndaş mövqeyinə görə tanınmış ziyalı və ictimai xadim Rüstəm İbrahimbəyov, hüquq müdafiəçisi Leyla Yunus və “Freedom House” beynəlxalq qurumu haqda böhtan yazılar dərc ediblər.  

“Azadlıq” qəzeti tanınmış ziyalı və ictimai xadim Rüstəm İbrahimbəyovun ölkənin siyasi partiyalarını, QHT  təmsilçiləri və ziyalılarını tərkibində birləşdirəcək Milıli Şuranın yaradılacağı haqda açıqlamasını manjetə çıxarıb.

Binəqədi rayonunun keçmiş icra başçısı Alı Qocayev və Təhsil Nazirliyi aparatının rəhbəri İlham Pirməmmədov keçmiş rektor Elşad Abdullayevin yaydığı visdomateriallarla bağlı istintaqa çağırılacaqlar. 

Keçmiş rektor Elşad Abdullayevin yaydığı videomateriallarla bağlı PA rəhbərinə qarşı keçmiş YAP-çılardan istifadə olunmasını yazan qəzet bunu “R.Mehdiyevə qarşı hücumun miqyasının genişlənməsi” adlandırır.

Suriyada davam edən vətəndaş müharibəsilə bağlı oradan qaçan 200 erməni ailəsi Zəngilanda məskunlaşdırılıb.   

“Zerkalo” ABŞ müdafiə nazirinin baş məsləhətçisinin Bakı səfərini “Amerikanın Azərbaycandan strateji müdafiə əməkdaşlığı istəməsi” kimi şərh edir.

Mənzil-kommunal təsərrüfatı, pərakəndə satış və ya məişət xidməti sahəsində çalışan xarici vətəndaşlar Azərbaycan dilindən imtahan verməli olacaqlar.  

“Ekspress” Qarabağ münaqişəsini tənzimləməli olan Minsk Qrupu həmsədrlərindən Rusiyanın Ermənistanı silahlandırmasına “Kremlsayağı münaqişə “nizamlama” ironiyasını ifadə edir.

“Azerspace” peyki fevralın 7-də orbitə çıxarılacaq. 

“Novoe Vremya”. Avropa Parlamenti prezidentinin seçki qanunvericiliyinin dəyişdirilməsi çağırışına rəsmi Bakı “buna ehtiyac yoxdur” cavabını verib. 

“Bizim yol”. Quzey Kipr Məclis sədri Hasan Bozer deputat Aydın Mirzəzadə Quzey Kipr bayrağına hörmətsizlik etdiyi üçün onunla görüşdən imtina etməsi haqda açıqlama verib. 

Mühakimə edilən “Talışi sədo” qəzetinin redaktoru Hilal Məmmədovun vəkili Xaliq Bağırov istintaqın əsassızlığına “ittiham aktı absurdluq üzərində qurulduğu üçün konkret danışmaq və ad çəkmək çətindir” mövqeyini ifadə eidb.  

“Yeni Müsavat” tanınmış ziyalı və ictimai xadim Rüstəm İbrahimbəyovun başçılıq etdiyi Kinematoqrafçılar İttifaqına qarşı başlanan cinayət işini rəsmi Bakının “Rusiya təhlükəsinə qarşı” hərəkətə keçməsi hesab edir. 

Yanvarın 13-də Lənkəran səfərində Müsavat başqanı İsa Qəmbərə və nümayəndə heyətinə basqına rəhbərlik edənlərdən biri Xosrov Xeybərov öz həmkəndlisi tərəfindən döyülüb. 

Moskvada nəşr edilən “Azərbaycan diasporu” qəzetinin redaktoru Rafiq Hüseynov adam oğurluğu ittihamı ilə axtarışa verilib. 

Qış semestr imtahanları ilə bağlı tələbələrdən kütləvi rüşvətin yığılmasını qəzet “ali məktəblərdə rüşvət mövsümünün qızğın çağı” adlandırır. 

“Bakı Xəbər” postsovet məkanında kriminal aləmin söz sahibi “Ded Xasan”ın qətlindən sonra həbsxanalarda “avtoritet razborkaları”nın başlanacağını nəzərə alan Penitensiar Xidmətin önləyici tədbirlər gördüyünü yazır.