Mətbuat-Monitorinq 18.08.15

Rəsmi qəzetlər  dövlət başçısı İlham Əliyevin sərhəd xidməti sistemindəki qulluqçularn bir qrupunun dövlət mükafatları ilə təltif edilmələri haqda sərəncamının mətnini ilk səhifələrdə yerləşdiriblər.

Bundan əlavə, bu qəzetlər Cəlilabad-Astanlı-Cəngan-Soltankənd avtomobil yolunun tikintisilə bağlı 3 milyon manat vəsaitin ayrılması haqda sərəncamın da mətnini dərc ediblər.

“Azadlıq” qəzeti parlament seçkiləri yaxınlaşdıqca YAP-da deputat olmaq istəyənlərin çoxluğu üzündən partiyadaxili gərginlik yaşanmasını ilk səhifəyə çıxarıb.

Qəzet ölkənin ictimai-siyasi, iqtisadi-sosial həyatı ilə bağlı yazılara yer verib. Paytaxtın bəzi yerlərində Nəqliyyat Nazirliyinin özəl taksilərin fəaliyyətinə qadağa qoymasına etiraz olaraq sürücülərin keçirdikləri aksiyanı qəzet “Bakıda taksi üsyanının baş verə bilməsi” kimi dəyərləndirir.

Milli Şura ölkədə parlament seçkisi öncəsi durumu dəyərləndirən hesabat hazırlayıb və hakimiyyət önünə konkret tələblər qoyub.  

Tanınmış tədqiqatçı alim Şirməmməd Hüseynov Heydər Əliyevin dövlət yaratması haqda rəsmi təbliğata “Heydər Əliyev dövlət yox, hakimiyyət yaradıb, dövləti Məhəmmədəmin Rəsulzadə yaradıb” cavabını verib.

Vətəndaşların sosial durumlarının “kritik həddə” olduğunu deyən ekspertlər pul gəlirlərinin azalmasına baxmayaraq, daxili bazarda qiytmətlərin artmasına diqqət çəkirlər.  

“Ekspress”  Rusiyanın Qəbələdə yeni RLS tikmək istəməsini diqqət mərkəzinə çəkib.

Ekspertlər “ucuz neft dövrü”nün hələ uzun sürəcəyini bəyan edərək  ABŞ-ın nertin qiymətinin artmasında maraqlı olmadığını bildirirlər.  

“Exo”   Bakı sakinlərinin gəlirlərinin 10-15%-ni əyləncələrə xərcləməsini ön plana çıxararaq bunu “azərbaycansayağı “cib istirahəti” adlandırır.

“Novoe Vremya”  BP-nin öz işçiləri arasında azərbaycanlıların ixtisara salınmasını davam etdirməsini önə çıxarıb.

“Bizim yol”  Rusiyanın Azərbaycanda hərbi baza tikmək istəməsini ilk səhifəyə yerləşdirib.

Universitetlərin birinci kurs tələbələrindən təhsil haqlarını bir dəfəyə tam ödəmək tələbi tələbələri təhsilsiz qoya bilər.

“Yeni Müsavat”  nəqliyyat naziri Ziya Məmmədovun vəzifədən kənarlaşdırılacağı iddiasını “ən qüdrətli nazir dəyişdirilir”  sərlövhəsilə önə çəkib.

Qəzet ölkədə sosial siyasi və idman həyatına dair məsələlərə toxunub. Sentyabrın 15-dən Bakı-Sumqayıt üzrə fəaliyyətə başlayacaq qatarda qiymətin 50-70 qəpik arasında olacağı bildirilir.

Müsavat Partiyasının başqanı Arif Hacılı ATƏT təmsilçilərilə görüşdə qarşıdakı parlament məsələsinin müzakirə olunduğunu nəzərə çatdırıb.

Cüdo üzrə milli yığma komanda üzvləri metronun “Koroğlu” stansiyası yaxınlığında keçirdikləri aksiyada komandanın maddi təminatına fikir verilməməsinə etiraz ediblər.