Mətbuat-Monitorinq 19-20.10.14

Rəsmi qəzetlər dövlət başçısı İlham Əliyevin Goranboy rayonuna, Naftalan və Gəncə şəhərlərinə səfəri, bu səfərlərdə bəzi obyektlərin açılışında iştirakı haqda xəbərləri ilk səhifələrində yerləşdiriblər.

“Azadlıq” qəzeti Azərbaycan iqtidarının beynəlxalq sanksiyaların bir addımlığında olması barədə xəbərdarlığı manjetə çıxarıb.

Azərbaycan büdcəsinin üzərində “dayandığı” neftin qyimətinin enməsinə baxmayaraq, rəsmi Bakının hələ də bahalı və dəyərsiz layihələrdən əl çəkməməsini qəzet “hakimiyyətin ölkə iqtisadiyyatını məhvə aparması” adalndırır.

“Yeni Müsavat” Rusiyanın iki hərbi gəmisinin Bakıya gəlməsinin ardınca bp-nin Bakı buxtasında iki  gəmisinin olduğu iddiasını ilk səhifəyə çəkərək bunu “Xəzər və Abşeron uğrunda ABŞ-RF savaşı” kimi dəyərləndirir.

“Amerikanın Səsi”nin separatçı Dağlıq Qarabağ rejimi haqda film çəkməsini ekspertlər “ABŞ-ın ən azı Cənubi Qafqaz üçün ədalətli münsif ola bilməməsi” kimi şərh ediblər.

Kremlin layihəsi olan Avrasiya İttifaqına daxil olmaq üçün rəsmi Bakının “öncə ərazilər qaytarılsın” şərtini qoymasına “Kremlin vədinə bel bağlamaq olarmı” şübhəsini diqqət mərkəzinə çəkir.