Mətbuat-Monitorinq 19.06.14

Rəsmi qəzetlər dövlət başçısı İlham Əliyevin RF xarici işlər naziri Sergey Lavrovu, Avropa Şurası Yerli və Regional Hakimiyyətlər Konqresinin prezidenti Herviq van Staanı qəbul etməsi haqda xəbərləri ilk səhifələrə yerləşdiriblər.

Hakim YAP-ın orqanı olan “Yeni Azərbaycan” qəzeti isə bugünkü sayında ABŞ-ı şantaj edən “ABŞ-ın hegemonluq fəlsəfəsinə söykənən xaos strategiyası: bəşəriyyət yeni qlobal təhdidlərlə qarşı-qarşıya” adlı birsəhifəlik məqalə dərc edib. 

“Azadlıq” qəzeti RF xarici işlər naziri Lavrovun Bakıda “Qarabağ məsələsi beynəlxalq danışıqların predmetidir” bəyanatını rəsmi Bakının “Rusiya Qarabağı qaytarmaq üçün ermənilərə təzyiq edəcək” iddiasının üstündən xətt çəkməsi və hakimiyyəti pərt etməsi adlandıraraq ilk səhifəyə çıxarıb.

“Azəreneji”nin rəhbəri Etibar Pirverdiyevin Zirə kəndində çimərliyi hasarlayaraq istirahət mərkəzi tikdirməsini qeyd edən qəzet ölkədə məmur özbaşınalığının davam etməsi kimi dəyərləndirir. 

Rəsmi Bakının ölkədə biznes üçün əlverişli mühitin yaradılması haqda iddialarına baxmayaraq “Ekonomist İntelligence Unit” təşkilatının biznes mühiti reytinqinə dair hesabatında Azərbaycan 82 ölkə arasında 73-cü yeri tutub.

Kənd Təsərrüfatı Nazirliyi kəndli fermerlərə ayrılan subsidiyaların 50%-ni işbazların mənimsəməsi haqda Baş Prokurorluğa şikayət edərək bu faktın bütün rayonlarda qeydə alındığını bildirir.

“Ekspress”  rəsmi Bakının iddialarına baxmayaraq, Rusiyanın Qarabağla bağlı hər hansı vəd vermədən Azərbaycanı Avrasiya İqtisadi İttifaqında görmək istəməsini önə çəkib.

Ailə-məişət zəminində bu ilin 5 ayı ərzində 14 kişinin arvadını, 2 qadının ərini öldürməsi, 11 kişinin arvadını öldürməyə cəhd göstərməsi faktlarını qəzet “nikahdan qətlə gedən yol” adlandırır.

ARDNŞ-in H.Z.Tağıyev adına Neft-Qaz Çıxarma İdarəsində köhnə qurğuların təmiri zamanı baş verən partlayışa toxunan qəzet partlayış nəticəsində qaynaqçılar Zakir Əliyev və Dmitri Baranovun həlak olduqlarını nəzərə çatdırır.

“Exo” bu ilin ötən müddəti ərzində milli ordunun 43 əsgərini itirməsini, bu günlərdə isə daha bir əsgərin xəstəlikdən dünyasını dəyişməsini diqqətə çatdırır.

“Novoe Vremya” Ukraynada Rusiyaya qarşı “cəza” əməliyyatlarında iştirak etmələri üçün azərbaycanlıların “ələ alınması” iddiasını ilk səhifəyə çəkib.

“Bizim yol”  ARDNŞ-nin tabeliyində olan Azərbaycan Beynəlxalq Təhsil Kompleksinin məktəb və bağçalarının fəaliyyətini dayandırması haqda qərarını “Fətullah Gülənin Azərbaycanda məktəblərinin bağlanması” adlandırır.

“Yeni Müsavat”  insan haqlarının pozulduğU, çoxsaylı siyasi məhbuslar olduöu Azərbaycanın Avropa Şurası Nazirlər komitəsinə sədrlik etməsini “hakimiyyəti çətin Strasburq imtahanının gözləməsi” sayaraq önə çəkir.

Dini Komitənin strateji fəaliyyət proqramında Qafqaz Müsəlmanları İdarəsinin səlahiyyətlərinə açıq müdaxilə olduğunu yazan qəzet bunu “dini sahədə  komtənin ağırlığının artırılması” kimi dəyərləndirir.

Qəzet oliqarxlara məxsus tikinti şirkətlərinin onlara bağlı olmayan şirkətləri bazardan sıxışdırdığı, özlərinə lazım olan materialları xaricdən gətirdikləri üçün ölkənin tikinti bazarının “donması”nı nəzərə çatdırır.