Mətbuat-Monitorinq 19.09.13

Rəsmi və iqtidaryönlü qəzetlər dövlət başçısı İlham Əliyevin Quba rayonuna səfəri, burada bəzi obyektlərin açılışında iştirakı haqda yazırlar. Bundan əlavə, bu qəzetlərdə Naftalanın sosial inkişafı üçün rayona 4 milyon manat vəsaitin ayrılması haqda sərəncamın mətni dərc edilib. 

“Azadlıq” qəzeti Britaniya mətbuatının İlham Əliyevi “ qaz diktatoru” adlandırmasına diqqət çəkərək avtoritar Əliyev rejimilə demokratik Qərb arasında qarşıdurmanın davam etdiyini nəzərə çatdırır. 

Seçkilər prosesini diqqət mərkəzində saxlayan qəzet Milli Şuranın Seçki Strategiyası Mərkəzinin toplandığını, ATƏT-in müşahidə missiyası koordinatorlarının Milli Şuranın namizədi Cəmil Həsənlilə görüşdüklərini bildirir.    

Prezidentliyə namizəd C.Həsənli seçki kampaniyası çərçivəsindəki çıxışında həbsdə olan dindarları müdafiə etməsini AİP Məclisini üzvü Natiq Kərimov “inanclı kəsim üçün ən böyük hədiyyə” adlandırıb.   

Azərbaycanda seçkilərlə bağlı ATƏT-in hesabatını rəsmi Bakının tənqidə məruz qoymasını qəzet “YAP-ın təşvişə düşməsi” adlandırır.   

Jurnalist və QHT rəhbəri Pərvz Həşimlinin həbsinə toxunan qəzet yazır ki, P.Həşimli hələ həbsindən iki həftə öncə ailəsinə MTN-in ona qarşı əməliyyat hazırladığını, bunun arxasında MTN-in Antiterror Mərkəzinin rəis müavini İlqar Əliyevin durduğunu nəzərə çatdırıb. 

“Zerkalo” jurnalist və QHT rəhbəri Pərviz Həşimlinin həbsinə diqqət çəkərək fakta “daha bir “əlverişli” olmayan jurnalist saxlanılıbb?” mövqeyini ifadə edir. 

“Exo” qeyd edir ki, iqtidarın “Bakını gözəlləşdirmə siyasəti”nin qurbanı olan Bakı sakinləri seçkidə səs vermək üçün əvvəl yaşadıqları rayonların polis bölməsindən şəxsiyyət vəsiqəsi almalıdırlar.  

“Novoe Vremya” son aylarda dövlət başçısının məmurları qudurğanlıq, harınlıqda ittiham edərək hədələməsinə “məmurların “iştahalarının sonunun  görünməməsi” kimi yanaşma ifadə edir. 

“Bizim yol” jurnalist və QHT rəhbəri Pərviz Həşimlinin həbsinə önəm verərək ilk plana çəkir və jurnalistin özünə qarşı bütün ittihamları rədd etdiyini nəzərə çatdırır. 

Qəzet Milli Elmlər Akademiyasındakı kadr islahatını prezident Akif Əlizadənin rəhbərliyə “öz adamlarını gətriməsi” kimi dəyərləndirir.   

“Yeni Müsavat” yazır ki, Milli Şuranın prezidentliyə namizədi Cəmil Həsənlinin çıxışını siyasilər “əla başlanğıc, açıq və prinsipial taktikanın üstünlüyü” kimi şərh ediblər.

C.Həsənli özü isə çıxışda təmkinini itirmədiyini, sadəcə iqtidarı ifşa edən sərt faktları açıqladığını söyləyib.

Jurnalist və QHT rəhbəri Pərviz Həşimlinin həbsinə toxunan qəzet onun məhkəmədən aparılarkən başına qara torba keçirildiyinə diqqət çəkir. 

AZALın prezidenti Cahangir Əsgərov dövlət başçısını aldadaraq özəl təyyarəyə sahib məmurların siyahı və hərəkər trayektoriyasını ona verməyib, amma İ.Əliyevə bu dosyenin verildiyi, dosyedə sensasion isimlərin olduğu deyilir.