Mətbuat-Monitorinq 20.09.13

Rəsmi və iqtidaryönlü qəzetlər dövlət başçısı Ilham Əliyevin prezidentin fərdi təqaüdlərinin verilməsi, neft sənayesi işçilərinin təltif olunması, Şəmkir rayonunun sosial inkişafı üçün 5 milyon manatın ayrılması haqda sərəncamlarının mətnlərini dərc ediblər.  

“Azadlıq” qəzeti prezident seçkilərilə bağlı İTV-dəki çıxışında Milli Şuranın prezidentliyə vahid namizədi Cəmil Həsənlinin cəmiyyətdə “balıq Hafiz” kimi tanınan şəxsin fiziki təzyiqinə məruz qalmasını manjetə çıxarıb və bunu “İTV-də Əliyevi rəzil edən debat” adlandırır. 

Siyasilər “balıq Hafiz”in hərəkətinə “ölkəni belə binamuslardan təmizləmək zamanının gəldiyi”, “balıq Hafizin mövcud iqtidarın mahiyyəti olması”, “Cəmil Həsənlinin seçki prosesini MSK adlı tabutdan çıxarması”, “C.Həsənlinin artıq Milli Şuranın yox, xalqın vahid namizədi kimi legitimləşməsi” şərhini veriblər. 

Bakı kəndlərinin ağsaqqallarından Natiq Kərimov Bakı kəndlərinin əksəriyyətinin seçkilərdə Cəmil Həsənlini dəstəkləyəcəyini bəyan edib. 

Prezidentliyə namizəd Cəmil Həsənli özü isə “Əliyev ailəsinin ifşası üçün hər şeyi edəcəyi” barədə bəyanat səsləndirib. 

Qəzet seçki təbliğatı çərçivəsində Milli Şuranın 22 sentyabr aksiyasına ciddi hazırlığın başlandığını bildirib. 

Klassik Xalq Cəbhəsi Partiyası sədrinin qərb bölgəsi üzrə müşaviri, milli-azadlıq mübarizəsinin fəalı,  bu yaxınlarda yol polisinə tabe olmamaq bəhanəsi ilə saxlanılan Əli Abdullayev bu gecə qəflətən vəfat edib. 

“Zerkalo” rəsmi Bakı ilə Vaşinqton arasında münasibətlərə toxunaraq “Azərbaycan-Amerika münasibətləri gündəliyində daha ciddi məsələlərin olduğunu” yazır, münasibətin indiki durumuna “Demokratiya və rəsmi Bakının şıltaqlıqları” mövqeyini ifadə edir. 

İqtisadi İnkişaf Nazirliyi Bakı mağazalarında endirimlərlə bağlı növbəti yalanı ifşa edib və qəzet bu endirimləri “nəzəri endirimlər” adlandırır. 

“Ekspress” Güney Azərbaycanın milli haqlarının mübarizi və nüfuzlu din xadimi höccətülislam Əbdüləziz Qədimi İran-Ermənisatn münasibətlərinin genişləndirilməsinə etiraza görə növbəti dəfə həbsə alnıb.  

“Exo” ekspertlərə istinadən ölkə əhalisinin 15%-nin varlı insanlar olduğunu  yazaraq onların illik gəlirlərinin bir neçə min manatdan milyard manat arasında olduğunu bildirir.  

“Novoe Vremya” PA-nın şöbə müdiri Novruz Məmmədovun ABŞ-a qəfil səfərinə “Novruz Məmmədov ABŞ-a hansı missiya ilə gedib?” sualı ilə qarşılıq verir.

“Bizim yol” prezidentliyə namizədlərin debatında “balıq Hafiz”in Milli Şuranın namizədi Cəmil Həsənliyə butulka atmasını “debatda dava” kimi dəyərləndirir, MSK-nın Cəmil Həsənli və “balıq Hafiz”in namizədlyini ləvğ edə biləcəyi barədə proqnoz verir. 

“Yeni Müsavat” prezidentliyə namizədlərin debatında Milli Şuranın vahid namizədi, tarixçi-professor Cəmil Həsənlinin Əliyevlər ailəsilə bağlı açıqladığı faktlara görə “balıq Hafiz” tərəfindən təhqirlərə məruz qalmasını ilk səhifəyə çıxarıb. 

Müsavat Partiyasının başqanı İsa Qəmbər isə bu hərəkəti “həqiqətlərə tab gətirməyən iqtidarın debatı pozmaq çəhdi” adlandırıb. 

Qəzet yazır ki, polis əməkdaşları Cəmil Həsənlinin təbliğatını aparan 20-yə yaxın gənci saxlayaraq naməlum istiqamətə aparıb. 

Dağüstü parkda Milli Şuranın sədri Rüstəm İbrahimbəyova məxsus ərazi zəbt edilib, burada otel tikilir. 

Qəzet PA-nın şöbə müdiri Novruz Məmmədovun Vaşinqtona göndərilməsini “rəsmi Bakı ilə Ağ Ev arasında münasibətlərin pisləşməsinin rəsmən təsdiqlənməsi” adlandırır.