Milli Şuranın İTV-nin efirində Cəmil Həsənliyə qarşı baş verən haqsızlıqlarla bağlı bəyanatı

Demokratik Qüvvələrin Milli Şurası dünən axşam İctimai Televizyanın efirində prezidenliyə namizədlərin debatında baş verən qalmaqal, Milli Şuranın namizədi Cəmil Həsənliyə qarşı haqsızlıqlarla bağlı bəyanatla çıxış edib.

Bəyanatda deyilir: “Sentyabrın 19-da İctimai Televiziyada debatlar zamanı Demokratik Qüvvələrin Milli Şurasının Azərbaycan Respublikasının prezidentliyinə namizədi Cəmil Həsənliyə qarşı adi insani etikadan və qanundankənar davranışlara yol verilib.    

Cəmil Həsənli bu hücumların cavabını təmkinlə, ləyaqətlə və sərrast verib. Tamamilə haqlı olaraq bu hücumların arxsında İlham Əliyevin durduğunu bəyan edib.

Milli Şura Cəmil Həsənliyə qarşı bu hərəkətləri pisləyir və bunların aradan qaldırılması üçün qəti addımların atılmasını tələb edir.

Milli Şura Azərbaycan Respublikasının prezidentliyinə namizəd İlham Əliyevi öz tərəfdarlarını və vəkil etdiyi şəxsləri prezident seçkiləri kampaniyasını gözdən salan belə çirkin davranışlardan çəkindirməyə çağırır.

Milli Şura İctimai Televiziya rəhbərliyinə seçki debatlarına qanunsuz müdaxilələrin Seçki Məcəlləsinə zidd olduğunu xatırladır və üzərinə düşən vəzifələri tərəfsiz və düzgün yerinə yetirməyə səsləyir. İctimai Televiziyanın rəhbərliyi başqa namizədlərin qanunsuz hərəkətləri və müdaxiləsi nəticəsində Cəmil Həsənli üçün ayrılmış vaxtın itkisini bərpa etmək vəzifəsi daşıyır.

Milli Şura Mərkəzi Seşki Komissiyasından Cəmil Həsənliyə qarşı baş vermiş qanun pozuntularını qısa zamanda araşdırmağı, onun pozulmuş haqlarını bərpa etməyi, bu hadisəni törədənlərin barəsində ölçü götürməyi tələb edir.

Milli Şura xatırladır ki, Mərkəzi Seçki Komissiyasının üzvləri seçkilərin ədalətli və qanun əsasında keçirilməsinə, bütün namizədlərə bərabər imkanların yaradılmasına və hüquqlarının təmin olunmasına məsuliyyət daşıyırlar.-03D-