Teledebat zamanı Hafiz Hacıyev müxalifətçiləri onlarla haqq-hesab çəkiləcəyi ilə hədələyib

Sentyabrın 19-da İctimai Televiziyanın efirində prezidentliyə namizədlərin növbəti teledebatları Müasir Müsavat Partiyasının sədri Hafiz Hacıyevin  təhrik etdiyi qalmaqalla keçib. 

O, Demokratik Qüvvələrin Milli Şurasının (DQMŞ) prezidentliyə namizədi Cəmil Həsənlinin və onun ailə üzvlərinin, həmçinin digər müxalifət liderlərinin ünvanına təhqiramiz ifadələr işlədib. 

H.Hacıyev DQMŞ-ni “Satqınlar Şurası” adlandırıb. AXCP lideri Əli Kərimlini “Əbülfəz Elçibəyi (AXCP-nin  mərhum lideri və eks-prezident) zəhərləməkdə ittiham edib. 

Sıra İsa Qəmbərə də çatıb. H.Hacıyev onu oğlunu hərbi xidmətdən yayındırmaqda və “gəncləri yoldan çıxarmaqda” ittiham edib.  

H.Hacıyev müxalifət liderlərini “ermənilərlə əlbir olmaqda” və Qarabağ probleminin həllinə əngəl törətməkdə ittiham edib.  

Sonra Hacıyev bildirib ki, müxalifət xarici qüvvələrə “işləyərək” onların xeyrinə çevriliş  hazırlayır.

C.Həsənlinin qızının ingilis ilə evli olmasına toxunan Hacıyev C.Həsənlini onların (britaniyalıların) göstərişi  ilə Azərbaycanda dağıdıcı fəaliyyət aparmaqda ittiham edib. 

H.Hacıyevin çıxışından sonra bəzi namizədlər, əsasən Demokrat Partiyasının lideri Sərdar Cəlaloğlu və Bütöv Azərbaycan Xalq Cəbhəsi Partiyasının rəhbəri Qüdrət Həsənquliyev şəxsi həyata müdaxilənin yolverilməz olduğunu bildiriblər. 

C.Həsənli öz çıxışında bildirib ki, sentyabrın 22-də Yasamal rayonundakı stadionda (“İnşaatçılar” metro stansiyasının yaxınlığı) ona dəstək mitinqi keçiriləcək. O həmçinin bildirib ki, studiyaya vaxtından əvvəl pensiyaya çıxmaq məqsədilə həkimləri aldatması ilə bağlı ünvanına söylənən ittihamları təkzib edən sənədlərlə gəlib. O qeyd edib ki, gözünün xəstə olması Zərifə Əliyeva adına Oftalmologiya İnstitutunun həkimləri tərəfindən  təsdiqlənib.  

Sonra C.Həsənli diqqəti Azərbaycan hökumətindəki miqyaslı korrupsiyaya yönəldib. 

Belə ki, Kür zonasında daşqınların və Zaqatala regionunda zəlzələnin nəticələrinin aradan qaldırılmasına 1 mlrd. 69 mln. manat ayrılıb və əhalinin problemləri indiyədək həllini tapmayıb. Türkiyədə Van vilayətində baş vermiş və miqyasına görə daha dağıdıcı olan zəlzələnin nəticələrinin aradan qaldırılmasına cəmi 392 mln. dollar xərclənib. 

Sonra C.Həsənli İlham Əliyevin üçüncü müddətə  prezidentliyinin irəli sürülməsinin qanunsuz olduğunu deyib. Onun sözlərinə görə, İ.Əliyev Konstitusiyaya and içəndə bu, 1 şəxsin 2 səlahiyyət müddətinə prezident postunda qalmasını nəzərdə tuturdu. 

Odur ki, 2009-cu ildə referendumda qəbul edilmiş Konstitusiya düzəlişləri İ.Əliyevə  şamil olunmur.

O həmçinin prezidentliyə namizəd kimi İ.Əliyevin demokratik dövlətlərdə qəbul olunduğu kim özünün və həyat yoldaşının gəlirlərini açıqlamağı tələb edib. “Mən yeganə namizədəm  ki, yalnız özümün deyil, həm də həyat yoldaşımın gəlirlərinə dair bəyannamə təqdim etmişəm”, - C.Həsənli bildirib. 

O həmçinin İ.Əliyevi qanun pozuntusunda və kampaniya başlamazdan əvvəl seçkiqabağı təşviqat aparmaqda ittiham edib. Deyilənlər nəzərə alınmaqla C.Həsənli İ.Əliyevin prezidentliyə namizədliyinin qeydiyyatının ləğvini tələb edib.  

O, İ.Əliyevin nümayəndəsi, hakim Yeni Azərbaycan Partiyasının sədr müavini Əli Əhmədovdan  tələb edib ki, dövlət başçısının ailə üzvlərinin Dubaydakı villaları və onların offşorlardakı şirkətləri haqqında sənədli açıqlama təqdim etsin. 

Sonra H.Hacıyev yerindən sıçrayaraq C.Həsənlinin çıxışını kəsib, müxalifətçiləri təhqir etməkdə davam edib. O, müxalifətçiləri onlarla haqq-hesab çəkiləcəyi və qalib gələrsə ölkədən sürgün ediləcəkləri ilə hədələyib.  

H.Hacıyev yenidən C.Həsənlini qızının ingilis ilə ailə qurmasına görə ittiham edib. 

Bunun cavabında C.Həsənli deyib ki, əgər “bütün günahlar” onun qızının ingilis ilə ailə qurmasındadırsa, İlham Əliyevin qızları da ölkənin sərvətini xaricə daşıyırlar. 

Bunun cavabında H.Hacıyev C.Həsənliyə butılka atıb.

Heç cür sakitləşməyən H.Hacıyevi İctimai Televiziyanın təhlükəsizlik xidmətinin  əməkdaşları zaldan çıxarıblar. 

İ.Əliyevin səlahiyyətli  nümayəndəsi, Yeni Azərbaycan Partiyasının sədr müavin Əli Əhmədov C.Həsənlini özünü “abırsız, ləyaqətsiz” aparmamağa çağırıb. 

Buna cavab olaraq C.Həsənli deyib ki, abırsız da, mənəviyyatsız da hakimiyyətin özüdür, YAP dizəcən, İlham Əliyev isə boğazacan korrupsiyanın içindədir.  

Sonra C.Həsənli YAP-ın təsisçilərindən biri Sirus Təbrizlinin bu sözlərini yada salıb ki, YAP “simasız quldurlar” partiyasına çevrilib. 

C.Həsənli H.Hacıyevin onun ünvanına hücumların qarşısını almağa sərf etdiyin vaxtın bərpa olunmasını tələb edib.  

Aparıcı bundan imtina edərək bütün şikayətləri MSK-ya təqdim etməyi təklif edib. 

C.Həsənli öz hüquqlarının pozulmasına etiraz olaraq studiyanı tərk edib. 

Qeyd edək ki, H.Hacıyev demək olar ki, bütün parlament və prezident seçkilərində  bu cür qalmaqallara təhrik edir.  

Qeyd edək ki, digər namizədlərin əksəriyyəti  efir vaxtından Milli Şuraya və C.Həsənliyə hücum üçün istifadə ediblər.—06D--