Xədicə İsmayılın işi üzrə məhkəmə prosesi sentyabrın 24-nə keçirilib

Binəqədi rayon məhkəməsində araşdırmaçı-jurnalist Xədicə İsmayıla qarşı bu gün baxılan inzibati iş sentyabrın 24-nə qədər təxirə salınıb, bu barədə Turan-a vəkil Anar Qasımlı bildirib.

İşin təxirə salınmasına səbəb İsmayılın prosesə gəlməməsi olub. O, hələ sentyabrın 19-da axşam Praqadan gələcək.

Məhkəmə prosesi İsmayılın 220 saat ictimai işdən ibarət inzibati cəzanı yerinə yetirməməsi ilə bağlıdır. Bu cəza öz növbəsində jurnalistin yanvarın 26-da Bakıda icazəsiz etiraz aksiyasında iştiraka görə 400 manatlıq pul cəriməsini ödəməkdən imtina etməsi ilə bağlı təyin edilib.

Jurnalist hesab edir ki, cərimə qanunsuz olaraq kəsilib, belə ki, o, konstitusiyada zəmanət verilmiş sərbəst toplaşmaq azadlığını həyata keçirib.

İyunun 10-da onun cəriməsi ictimai iş - küçələrin süpürülməsi ilə əvəz edilib və İsmayıl bununla razılaşıb və cəzanın icrasını “Ölkəni pisliklərdən təmizləyək” şüarı altında aksiyaya keçirəcəyini bildirib. Bundan sonra onun küçələri süpürmək cəzasını əlillərin reabilitasiyası mərkəzində təmizlik işləri ilə əvəz ediblər.

Lakin İsmayıl təxribatdan uzaq olmaq məqsədilə ictimaiyyət üçün açıq olmayan müəssisədə cəzanı icra etməkdən imtina edib.

İndi İsmayıl inzibati cəzanı icra etmədiyinə görə 3 ayadək azadlıqdan məhrum edilə bilər. -16D-