Mətbuat-Monitorinq 21.11.14

Rəsmi qəzetlər dövlət başçısı İlham Əliyevin Beynəlxalq Olimpiya və Avropa Olimpiya komitələrinin prezidentlərini qəbul etməsi haqda xəbərləri,  texnika təminatı və heyvandarlığın inkişafı üçün “Aqrolizinq” ASC-yə 18 milyon manatın ayrılması, General Əlağa Şıxlinskinin 150 illik yublieyinin keçirilməsi, ədliyyə orqanları əməkdaşlarının bir qrupunun təltif olunması haqda sərəncamların mətnlərini ilk səhifələrdə yerləşdiriblər.

“Azadlıq” qəzeti vaxtilə mövcud iqtidarın müdafiəçisi, indi mühacir həyatı yaşayan Hüseyn Abdullayevin rəsmi Bakıda mülklərinin dağıdılması ilə bağlı “əlinizdən nə gəlir edin, məni hələ də yaxşı tanımamısınız” cavabını önə çəkib.

Qəzet bu günlərdə Sumqayıt polisində işgəncə görən bir qrup sələfinin bu işgəncələri sübut edən fotolar yaymalarına diqqət çəkir.

AXCP şöbə müdiri Rafiq Daşdəmirlinin oğlu Sənan Daşdəmirlinin narkotika ilə şərlənərək həbs olunmasını  qəzet “ataya görə oğul qisası” adlandırır. AXCP sədri Əli Kərimli bu həbsə görə  hakimiyyətə “belə namərd üsullara əl atanlar haqq etdikləri cəzanı alacaqlar” bəyanatını səsləndirib.

Siyasi fəaliyyətlərinə görə müxalif siyasilərin qohumlarının həbsə alınmalarını Milli Şuranın təmsilçiləri “hakimiyyətin 37-ci ilin repressiya maşınını yenidən işə salması” sayırlar.

AŞ insan haqları komissarı Nils Muiznieks İlham Əliyevin QHT-lərlə bağlı mürtəce dəyişiklikləri imzalamasını “İ.Əliyevin ümidləri doğrultmaması” hesab edib.

Bankların kredit faizlərini aşağı salmaları haqda parlament üzvlərinin təkliflərini Mərkəzi Bankın rədd etməsini ekspertlər “bu sahədə inhisarçılığın güclü olması” kimi şərh ediblər.

“Ekspress”  bu günlərdə Ermənistana məxsus hərbi helikopterin vurulmasına dair  ATƏT-in Minsk Qrupu həmsədrlərinin bəyanatını rəsmi Bakının “təxribat” saymasını diqqət mərkəzinə çəkib, Müdafiə Nazirliyi isə sənədə “təəssüf və təəccüb” ifadə  edib.

Neftin ucuzlaşması ilə bağlı prosesi təhlil edən ekspertlər bununla bağlı Neft Fondunun büdcəsində kəsirin  yaranmasının qaçılmaz olduğunu bəyan ediblər.

Daim “islam təəssübü”ndən dəm vuran İranda “erməni genosidi” ilə bağlı sərginin  açılmasını Azərbaycan siyasi fəalları “türkləri aşağılamaq” kimi dəyərləndiriblər.

“Novoe Vremya”  Avropa İttifaqının  Transxəzər qaz kəmərinin çəkilməsində israrlı olmasını önə çəkərək bu məsələyə anlaşılmaz “Transxəzər qaz kəməri, dubl-2” mövqeyini  ifadə edir.

Ermənistana məxsus  helikopterin vurulması ilə bağlı ATƏT-in  Minsk Qrupu həmsədrlərinin bəyanatını qəzet “həmsədrlərin vasitəçi olmaq bitərəfliyini unutmaları” sayır.

“Bizim yol”  “Fəqan -1“ şirkətinin sahibi Rauf Hüseynovun şəriki “İBRA Holdinq”in sahibi Tağı İbrahimovu qanunsuz əməllərdə və şəriklik qaydalarını pozmaqda ittiham etməsini ilk plana çıxarıb.

Gəncə Dövlət Universitetində rüşvət iddialarını araşdıran qəzetə bu qurumdan  “BDU-da rüşvət bizdən çoxdur” cavabı verilib.

“Yeni Müsavat”  Avstriyada Azərbaycan Mərkəzi Bankına, Rusiyada isə Beynəlxalq Bankın Moskva filiallarına qarşı ittihamları “iki əsas bankirin hədəfdə olması” sayaraq ilk səhifəyə çıxarıb.

Qəzet Bakı Şəhər İcra Hakimiyyətinin başçısı Hacıbala Abutalıbovu “gül bayramı” adı ilə hər il büdcədən 10 milyon manat pul oğurlamaqda ittiham edir.

Qəzetin yazdığına görə, həbsdə olan siyasi məhbuslar Tofiq Yaqubluya müxalif qəzetlər verilmir, Orxan Əyyuibzadənin isə səhhəti pisləşib.

Bankların kreditlə bağlı fazi dərəcələrinin yüskək olması səbəblərinə ekspertlər “bankların Mərkəzi Bankın mərkəzləşmiş resurslarından kredit alanda  qeyri-rəsmi ödənişlərə məcbur olmaları da faizlərə təsir edir” şərhini  veriblər.