Mirqədirovun bundan sonra həbsdə saxlanılması qanunsuzdur

Jurnalist Rauf Mirqədirovun həbs müddəti noyabrın 19-da başa çatıb və hazırda o, qanunsuz olaraq həbsdə saxlanılır. Bu barədə Turan-a vəkil Elmar Süleymanov bildirib.

Xatırladaq ki, Mirqədirov aprelin 19-da saxlanılıb və həbsdə saxlanma müddəti həmin vaxtdan etibarən hesablanır. İki gün sonra məhkəmə onu 3 ay müddətinə həbs edib və iyulda həbs müddətini 4 ay uzadıb.

Həbs müddəti başa çatıb və həbs müddətinin uzadılması haqqında yeni qərar qəbul edilməyib, buna görə jurnalist azad edilməlidir. Lakin bu, baş verməyib.

Bununla əlaqədar olaraq vəkillər Elmar Süleymanov və Fuad Ağayev noyabrın 20-də səhər baş prokurora, onun birinci müavininə, ədliyyə nazirinə, MTN rəhbərinə, ombudsmana, MTN istintaq təcridxanasının rəisinə teleqramlar göndəriblər.

Bütün teleqramlar ünvanına çatsa da, cavab almayan vəkillər saat 15.30-da MTN istintaq təcridxanasına gəliblər. Lakin növbətçi onları rəisin yanına buraxmaqdan imtina edib, onun yerində olmadığını bildirib.

Vəkillər jurnalistlə görüşmək istədikdə onun tibbi müayinə üçün həkimin yanında olduğunu deyiblər və gözləməyi təklif ediblər. Mirqədirovla görüşə nail olmayan vəkillər yenidən növbətçidən müvəkkilləri ilə görüş istəyiblər. Onlara yenidən rədd cavabı verilib, saat 18.00-da isə onlara istintaq təcridxanasını tərkt etməyi təklif ediblər.

Süleymanov bütün bunları Konstitusiyanın və Azərbaycan qanunlarının ciddi şəkildə pozulması kimi qiymətləndirilib.

Vəkil həmçinin Mirqədirovun məhkəmə qərarı olmadan həbsdə saxlanılmasını əsaslandırmaq üçün ona hansısa sənədləri imzalamağa məcbur etmək məqsədilə təzyiq göstərildiyindən ehtiyatlandıqlarını bildiriblər.

Vəkil Fuad Ağayev facebook-dakı nəşrində Mirqədirovun azadlıq və müdafiə hüquqlarının kobud şəkildə pozulduğunu bildirib və onun dərhal azad edilməsini tələb edib. -06D-