Mətbuat-monitorinq 22.12.15

Rəsmi qəzetlər ölkənin müdafiəsilə bağlı şəhid və əlil olanların ailələrinə 10 milyon manat ayrılması, “Ən yaxşı ümumi təhsil müəssisəsi”, “Ən yaxşı müəllim” müsabiqələri qaliblərinin müküfatlandırılması, Bakı Nəqliyyat Agentliyi yaradılması haqda dövlət başçısı İlham Əliyevin sərəncam və fərmanlarının  mətnlərini ilk səhifələrdə yerləşdiriblər.

Bu qəzetlər manatın 50% ucuzlşaması ilə ölkədə bahalıq başlamasına  baxmayaraq, “Manatın kursunun sərbəst buraxılmasında faciə axtarmağa ehtiyac yoxdur” kimi adi vətəndaşların həyatına laqeydlik olan məqalələr dərc ediblər.

 “Azadlıq” qəzeti dollar önündə manatın 50% ucuzlaşmasına “Azərbaycanda dollar zəlzələsi” mövqeyini manjetə çıxarıb.

“D-18” Gənclər Hərəkatı manatın “üzən məzənnə”yə keçməsi adı ilə xalqı ağır iqtisadi duruma salan rəsmi Bakını istefa verməyə çağırıb.

Ekspertlər manatın məzənnəsinin ucuzlaşması ilə yaranan iqtisadi böhranı yüngülləşdirmək üçün benzinin qiymətinin aşağı salınmasını vacib addım sayırlar.

Qəzet manatın devalvasiyaya uğramayacağı haqda rəsmi yalan vədlərə görə hökumətə “niyə istefaya getmirsiniz, xalqı daha neçə dəfə aldatmaq istəyirsiniz?” müraciəti edir.

Qəzet manatın dollar önündə 50% ucuzlaşmasının ölkənin alqı-satqı sistemində “qiymət bahalaşması” ajiotajı yaratmasına diqqət çəkir.

Ekspertlər manatın bir ildə iki dəfə devalvasiyaya uğramasına “il ərzində dünyada ən çox “ölən” manat olub” şərhi verirlər.

Qəzet ölkədəki haqsızlıqlara etiraz olaraq prokurorluq sistemindən istefa verən Müdafiə Nazirliyi mətbuat xidmətinin keçmiş rəhbəri Edar Sabiroğlunun oğlu Rüfət Eldaroğlunun müstəntiq kimi Zərdabda fəaliyyətini yoxlamaq üçün ölkə prokurorluğunun komissiya yaratdığını nəzərə çatdırır.

Qəzet ““Günəşli” yatağına üzən manat” adlı məqalədə ARDNŞ prezidenti Rövnəq Abdullayevi şirkəti “qohum-əqrəba şikəti”nə döndərməkdə, bacarıqsızlıqda ittiham edir.

Qəzet Nazirlər Kabineti yanında Bakı Nəqliyyat Agentliyi yaradılmasını faktiki Nəqliyyat Nazirliyinin ləvğvinin tərkib hissəsi kimi dəyərləndirir.  

 “Ekspress” qəzeti manatın dollar önündə 50 ucuzlaşmasını və dolların 3-5 manata qədər bahalaşa biləcəyini ön plana çıxarıb.

Yeni il bayramı ilə bağlı evlərə Şaxta baba çağırılmasını tənqid edən qəzet bu adla evlərə cinayətkarların gələ bilməsini də istisna etmirlər.

“Exo” qəzeti manatın 50% ucuzlaşmasını “manatın yıxılması” kimi diqqət mərkəzinə çıxarıb.

“Novoe Vremya” qəzeti manatın “üzən məzənnə rejimi”nə keçməsilə dəyərini 50% itirməsinə “Azərbaycanın hökumətin yürütdüyü istisadi siyasətin “əkdiyini biçməsi”” kimi dəyərləndirərək önə çəkib.

Qəzet manatın 50% ucuzlaşması ilə ölkədə başlayan bahalığı “devalvasiya şoku” kimi dəyərləndirir.

Nəqliyyat naziri Ziya Məmmədovun get-gedə səlahiyyətlərini itirməsinə qəzet “portfelsiz nazir” şərhini nəzərə çatdırır. 

“Bizim yol” qəzeti Mərkəzi Bankın devalvasiyaya getməsini, dolların kəskin bahalaşmasını “Azərbaycanda 21 dekabr şoku” kimi ilk səhifəyə yerləşdirib.

Qəzet manatın devalvasiyası ilə bağlı ölkənin alqı-satqı sisteminin dayandığını, endirim kampaniyalarının ləğv olunduğunu, mənzil, geyim, elektirk avadanlıqları bazarının bağlandığını bəyan edir.

Ekspertlər manatın devalvasiya ilə bağlı qiymətlərin bahalaşacağını, daşınmaz əmlakın ucuzlaşacağını, aztəminatlı ailələrin ciddi sosial problemlərlə üz-üzə qalacağını bəyan edərək, devalvasiyanın dağıdıcı təsirlərini aradan qaldırmağa ölkənin hazır olmadığı xəbərdarlığı ediblər.

Qəzet son 3 ayda ölkəyə cəmi 4500 ədəd avtomobil gətrilməsini “avtomobil bazarının çökməsi” kimi dəyərləndirir.

“Yeni Müsavat” qəzeti dollar və avro önündə manatın 50% ucuzlaşmasını “qara bazar ertəsi-“yaşıl inqilab”ın ölkəni çalxalaması” kimi ilk səhifəyə çıxarıb.

Uzun illər dünyadakı böhranın Azərbaycana təsir etməyəcəyi kimi yalan bəyanatları ilə xalqı aldadan rəsmi Bakı indi manatın 50% ucuzlaşmasını dünyadakı böhranın təsirilə izah edir.

2015-ci il ərzində manatın iki dəfə devalvasiyaya uğramasına toxunan qəzet manatın dəyərini 98% itirməsinə diqqət çəkir.

Mərkəzi Bank rəhbəri Elman Rüstəmovun 2015-ci ilin fevral və dekabrında manatın devalvasiyaya uğramayacağı yalanı ilə çıxış etməsinə toxunan qəzet “Elman Rüstəmov qandallanmalıdırmı?” sualını gündəmə gətirir.