Mətbuat-Monitorinq 24.01.15

Rəsmi qəzetlər dövlət başçısı İlham Əliyevin Davos səfəri, görüşləri haqda xəbərtləri və çıxışını ilk səhifədə dərc ediblər.     

“Azadlıq” qəzeti Böyük Britaniya parlamentinin rəsmi Bakıdan siyasi məhbusların qeyd-şərtsiz azad olunması tələbini və rəsmi Londona Azərbaycan iqtidarına qarşı qəti addımlar atmaq çağırışını ilk səhifəyə çıxarıb.

Qəzet həbsdə olan jurnalist Xədicə İsmayıla yaxınları ilə görüş verilməməsini nəzərə çatdırır.   

Hüquq müdafiəçisi İntiqam Əliyev 119 min manat mənimsəməyə yol verməsi haqda ittihama qarşı məhkəmədə “əgər o puldan mənə bir manat belə çatıbsa ən axırıncı adam kimi ən ağır cəzanı çəkməyə hazıram” bəyanatını səsləndirib.

Yanvarın 27-də Strasburqda AŞ-nın təşkilatçılığı ilə “Azərbaycanda mətbuat azadlığı: jurnalistlərə qarşı repressiyalar” adlı tədbir keçirilməsi qərara alınıb.

“Ekspress”. “Murad-Farm” MMC-yə məxsus aptekdə psixotrop dərmanlar reseptsiz satıldığı üçün fəaliyyəti dayandırılıb.

Mütəxəssislər son 200 ildə Azərbaycanda 405 vulkan püskürməsi olduğunu qeyd edərək ölkədəki palçıq vulkanlarının 60%-nin aktiv olduğunu bildirirlər.

Bakı Baş Polis İdarəsində keçirilən iclasda 2014-cü ildə Bakıda 11635 cinayətin törədildiyi, 131 nəfərdən ibarət 54 cinayətkar qrupun tutulduğu bəyan edilib.

“Novoe Vremya”  AŞPA-nın qış sessiyası öncəsi bu qurumla bağlı “AŞPA-nın nüfuzu ləkələnib” mövqeyini ifadə edir.

“Bizim yol”  dövlət başçısı İlham Əliyevin Davosda “Rusiya-Ukrayna müharibəsi”ndən danışması kimi “aktual mövzu”nu diqqət mərkəzinə çəkib.

“Sevil Massivi” MTK-nın aldatdığı payçılar dövlət qurumların tərəfindən qəbul edilməmələrinə və cinayət işinin məhkəməyə göndərilməməsinə etiraz olaraq aksiya keçirəcəklər.

“Yeni Müsavat”   Qarabağ cəbhəsində erməni tərəfin atəşkəsi tez-tez pozmasını müharibə riskinin artması kimi dəyərləndirərək bu məsələdə “Kremlin barmağı”nın olmasını önə çəkib.

Qəzet AŞPA-nın qış sessiyasında jurnalist Elmar Hüseynov və yazar Rafiq Tağının qətllərinin üstünün açılmamasının da  müzakirə olunacağını bildirir.

2014-cü ilin dekabrında 14 saylı həbsxanada işgəncə ilə qətlə yetirilən məhbus Elşad Babayevin bacısı Simuzər Babayevə məhkəmə-tibb ekspertizasının qardaşının ürək tutmasından vəfat etməsi haqda rəy verdiyini bildirib.