Mətbuat-Monitorinq 25.09.13

Rəsmi və iqtidaryönlü qəzetlər dövlət başçısı İlham Əliyevin ATƏT/DTİHB-nin seçkiləri müşahidə missiyasının rəhbərini qəbul etməsi, kitabxana sistemində çalışanların bir qrupunun dövlət mükafatları və fəxri adlarla təltif edilmələri haqda sərəncam imzalaması haqda yazırlar.  

“Azadlıq” qəzeti “İctimai” TV-nin Milli Şuranın prezidentliyə vahid namizədi Cəmil Həsənliyə pullu efir verilməsindən imtina etməsinə göstərdiyi səbəbləri “qanunsuz bəhanələr” adlandırır. 

“Azadlıq” radiosunun keçirdiyi “seçkidə kimə səs verəcəksən” sorğusunda C.Həsənli 75,5% səs alıb. C.Həsənli ölkədə gənclərin həbsilə bağlı İlham Əliyevə “sən necə hamının prezidentisən ki, cavan uşaqların cibinə narkotik maddə atdırırsan?” sualını ünvanlayıb. 

AXCP sədri Əli Kərimli Milli Şuranın 22 sentyabr aksiyasından sonra oğlu Türkel Kərimlinin həbsinə “əqidəli insanlara qarşı repressiyanın tərkib hissəsi kimi baxdığı” bəyanatını səsləndirib. Təcridxanada T.Kərimliyə anası ilə görüş verməyiblər, təcridxana əməkdaşları bu haqda onlara göstəriş verildiyini etiraf ediblər. Vətəndaş cəmiyyəti institutlarının fəalları T.Kərimlinin həbsinə “bu həbs iqtidarın əxlaqını göstərir” mövqeyini ifadə ediblər. 

“Zerkalo” Kollektiv Təhlükəsizlik Müqaviləsi Təşkilatının Rusiyanın əlində şallağa döndüyünü yazan qəzet Ermənistanın bundan bacarıqla istifadə etdiyini bildirir. 

Qəzet bir aylıq yağıntının 200%-i qədər bir gecədə Bakıya yağan yağış önündə şəhər rəhbərliyinin növbəti dəfə gücsüzlük nümayiş etdirməsinə diqqəti çəkir. 

Qəzet Milli Şuraya efir verilməsindən imtina olunmasına, tərəfdarlarının basqınlara və həbslərə məruz qalmasına “Milli Şuraya hər tərəfdən hücum edirlər” şərhini verir.

“Exo” ekspertlərə istinadən ölkə vətəndaşlarının 20%-nin kredit hesabına yaşadığını yazaraq hesablamalara əsasən bu kateqoriyadan olanlara orta hesabla 780 manat borc düşdüyünü yazır.

“Novoe Vremya” ABŞ şirkətlərinin birinin sorğusunda prezident seçkiləri prosesində İlham Əliyevin reytinqinə görə favorit olması nəticəsinə “bağışlayın hansı reytinqdən danışırsınız?” sualı ünvanlayır. 

Qəzet Bakıya yağan yağışın fəsadlarını aradan qaldıra bilməyən şəhər təsərrüfatı rəhbərliyinin heç nəyə yaramadığının sübutu adlandırır. Şəhər infrastrukturuna bu qədər vəsaitin qoyulmasına baxmayaraq, səmərəsi olmamasına “bu qədər pulların havaya sovrulması” şərhini verir. 

“Bizim yol” yazır ki, politoloq Zərdüşt Əlizadə qardaşı, prezidentliyə namizəd Araz Əlizadənin çıxışına “bu çıxışlarda sosial-demokratizm yox, iqtidarın güddüyü məqsədlərin gerçəkləşməsi var” şərhini verib. 

Qəzet müəllimlərin valideynləri pulsuz almalı olduqları dərslikləri bazardan pulla almağa məcbur etmələrini “Təhsil Nazirliyinin “kitab bazarının ifşası” adlandırır. 

“Yeni Müsavat” Milli Şuranın prezidentliyə namizədi Cəmil Həsənlinn Qarabağdan bir qarış da torpağın azad edilməməsinə “korrupsiyaya bulaşmış iqtidar heç vaxt torpaq azad edə bilməz” bəyanatını səsləndirib.   

Qəzet iqtidar daxilində müəyyən qüvvələrin ölkədəkı seçki mühitinin normal olmasına qarşı çıxdıqlarını, durumu gərginləşdirmək üçün ciddi fəaliyyətə keçdiklərini iddia edir. 

Mühacirətdə olan eks-spiker Rəsul Quliyev Açıq Cəmiyyət Partiyasının sədri Sülhəddin Əkbərlə danışdığı audioyazıda Milli Şuranın 22 sentyabr mitinqi, Şura rəhbərlərilənə təhqiramiz ifadələrin yer almasını “danışığın montaj edilməsi” adlandırır. 

Bir gecəlik yağışdan sonra paytaxtın sel qularına qərq olmasına və paytaxt rəhbərliyinin tədbirlər görə bilməməsinə qəzet “Batan Bakı” mövqeyini bildirir.