Teledebatlarda Cəmil Həsənlinin təhqir olunması davam edir

 Sentyabrın 24-də İctimai Televiziyanın efirində prezidentliyə namizədlərin növbəti debatları bəzi iddiaçıların Demokratik Qüvvələrin Milli Şurasının (DQMŞ) namizədi Cəmil Həsənliyə hücumları şəraitində keçib.  

Bundan əvvəl C.Həsənlini öz qızını “ingilisə, xristiana” ərə verməkdə ittiham edən Müasir Müsavat Partiyasının sədri bu dəfə Milli Şuranı və onun liderlərini ermənilərin əlaltıları adlandırıb. 

O 6 dəqiqəlik çıxışını C.Həsənlinin və digər partiya liderlərinin tənqidinə sərf edib.  

Sosial-Demokrat Partiyasının sədri Araz Əlizadə etiraf edib ki, “Yeni Müsavat” qəzetində ona qarşı yazının dərcindən sonra müxalifətə öz nifrətini efir vasitəsilə bildirmək qərarına gəlib. O, C.Həsənlini və Müsavat Partiyasının lideri İsa Qəmbəri səriştəsizlikdə, satqınlıqda, platformanın olmamasında, yalan və böhtan yaymaqda ittiham edib.

İlham Əliyevin səlahiyyətli nümayəndəsi Mübariz Qurbanlı diqqəti mövcud prezidentin rəhbərliyi ilə Azərbaycanın uğurlu inkişafına yönəldib. Buna nümunə  kimi 10 ildə ÜDM-in 3,4 dəfə artdığını göstərib. 

Əhaliyə kreditlərin ağır şərtlərlə verilməsi barədə tənqidləri rədd edən Qurbanlı bildirib ki, kiçik biznesə 1 mlrd. 200 mln. manat həcmində güzəştli kredit verilib.

O həmçinin səhiyyə və təhsil sahələrinə yüksək vəsaitlərin ayrıldığını qeyd edib. 

Lakin buna cavab olaraq Ümid Partiyasının sədri İqbal Ağazadə deyib ki, əgər həkimlərin orta əmək haqqı 150 manat (190 dollara yaxın), müəllimlərin əmək haqqı isə 167 manat (210 dollara yaxın) təşkil edirsə, TQDK hər il ali məktəblərə keçid balını aşağı salırsa səhiyyədə və təhsildə hansı keyfiyyətdən söhbət  gedə bilər?  

Kreditlərə gəlincə, Mərkəzi Bank onlara oliqarx qruplarının nəzarətində olan kommersiya banklarına 3 faizlə verir, onlar isə əhaliyə 27-30 fazilə verirlər. Əhalinin banklara borcları 700 mln. manata çatıb.

Ədalət Partiyasının sədri İlyas İsmayılovu təmsil edən İslam Partiyasının sədr müavini Akif Heydərli (Ədalət, İslam və Yaşıllar partiyaları “Vətən” blokunda birləşiblər) diqqəti dindarların hüquqlarının pozulmasına, islamçıların qanunsuz  təqib olunmasına, məktəblərdə hicaba qanunsuz qadağa qoyulmasına yönəldib. 

Milli Dirçəliş Hərəkatı Partiyasının lideri Fərəc Quliyev aqrar istehsalçılar üzrə proteksionist siyasətinin vacibliyindən və idxalçıların inhisarının qarşısının alınmasından danışıb. O, çıxışının yarısını Milli Şuranın tənqidinə həsr edib.

Demokrat Partiyasının lideri Sərdar Cəlaloğlu hakimiyyəti siyasi qisaslara əl atmamağa çağırıb. O, AXCP lideri Əli Kərimlinin oğlunun, bundan əvvəl isə İsa Qəmbərin oğlunun həbsini pisləyib. 

S.Cəlaloğlu xatırladıb ki, 10 il əvvəl onu həbs edərkən silahlı şəxslər 6-cı sinifdə oxuyan qızının başına avtomat dayamışdılar. 

“Atalarına görə uşaqlardan qisas almaq mənəviyyatsızlıqdır. Hətta qanlı diktator Stalin deyirdi ki, “uşaqlar atalarına görə cavabdeh deyil”, - S.Cəlaloğlu bildirib.

Bütöv Azərbaycan Xalq Cəbhəsi Partiyasının lideri Qüdrət Həsənquliyev diqqəti Cəmil Həsənlinin tənqidinə yönəldib. 

Cəmil Həsənli hakimiyyəti müxalifətçilərin övladlarının təqib olunmasına son qoymağa çağırıb. O xatırladıb ki son günlər Əli Kərimlinin oğlu saxlanılıb, Milli Şuranın mətbuat katibi Oqtay Gülalıyevin 16 yaşlı oğlu vəhşicəsinə döyülüb.

C.Həsənli yenidən İlham Əliyevi debatlara gəlməyə, işğal olunmuş torpaqların azad edilməsi üçün niyə indiyədək heç bir iş görməməsinin, vəd olunmuş islahatların yerinə yetirilməməsinin səbəblərini  açıqlamağa çağırıb. 

Buna cavab olaraq M.Qurbanlı və Z.Oruc C.Həsənlini ittiham ediblər ki, onu dəstəkləyən qüvvələr 1992-93-cü illərdə strateji hərbi mövqelərini itiriblər və hazırda problemin həlli çətinləşib. Azərbaycan problemi öz iqtisadi və hərbi gücünü möhkəmlətməklə həll edir. 

Bunun cavabında C.Həsənli deyib ki, korrupsiyaya uğramış Əliyev rejimi torpaqların azad edilməsi problemini həll edə bilməz, çünki ölkənin sərvətinin xaricə daşınması ilə məşğuldur.

“İlham Əliyev Gədəbəydəki qızıl mədənlərini özünə götürür, amma seçki öncəsi xalqın əmək haqqını 10 manat artırır, məcburi köçkünlərin çörək pulu 1,5 manata çatır”, - o qeyd edir.

C.Həsənli xatırladıb ki, 10 il əvvəl İ.Əliyev deyib ki, bütün azərbaycanlıların prezidenti olacaq, amma indi xalqı milli və antimilli qüvvələrə bölür.

O həmçinin xalqın ən yaxşı oğullarına qarşı repressiyaların olduğunu bildirib.

Sonda C.Həsənli deyib ki, nə qədər ki, bu despotik rejim hakimiyyətdədir, ölkədə ədalət və inkişaf olmayacaq. –06D--