Mətbuat-Monitorinq 26.01.13

Rəsmi qəzetlər dövlət başçısı İlham Əliyevin Davos səfəri çərçivəsində görüşləri haqda yazırlar. Bu qəzetlər YAP icra katbi Əli Əhmədovun “Şöhrət” ordenilə təltif olunması haqda sərəncamın mətnini dərc ediblər.

Rəsmi qəzetlər İsmayılı rayonunda baş vermiş xalq etirazlarını “hansısa qüvvələrin dövlətçilik əleyhinə təşkil etməsi” kimi təqdim etmək istəyirlər. Bununla yanaşı bu qəzetlər tanınmış ziyalı və ictimai xadim Rüstəm İbrahimbəyov, hüquq müdafiəçisi Leyla Yunusun haqqında təhqiramiz yazılarını davam etdirirlər.   

“Azadlıq” qəzeti Əliyevlərin Ukraynada malikanəsinin tapıldığını, Ukrayna televiziyasının Konça-Zaspadakı 5 milyonluq imarət haqda reportaj yayımladığını yazır. 

“Binə” Ticarət Mərkəzində və İsmayıllıdakı olaylarda polisin vətəndaşlara qarşı vəhşiliklərinə etiraz olaraq bu gün ölkə vətəndaşlarının aksiya keçirəcək. 

ABŞ-ın Azərbaycan səfirliyi Göyçay və Qəbələ rayonlarında gözlənilən kütləvi aksiyalarla bağlı ölkədəki vətəndaşlarına bu rayonlara getməməyi tövsiyə edib. 

Gəncənin keçmiş polis rəisi Rasim Musayev İnterpolun Azərbaycanda Milli Mərkəzi Bürosunun rəis müavini təyin edilib. 

Politoloqlar ölkədə intensivləşən irimiqyaslı etiraz aksiyaları ilə bağlı qəzetə “iqtidar islahatlara getməsə üsyanlar ölkə boyu yayılacaq” şərhini veriblər. 

“Ekspress”. “AzərRos”un yeni Ağsaqqallar Şurasının sədri Abbas Abbasovun Diaspor Komitəsinin sədri Nazim İbrahimovun quruma olan iradlarına “sən məmursan, icmaya nə etməli olduğunu diqtə edə bilməzsən” cavabını verib. 

“Exo”. Bakıda sakinlərin 70%-i istəsə də yeni mənzil almaq arzusunu reallaşdıra bilmir, təxirə salınan tələbat isə mənzillərin qiymətini dəyişdirə bilmir.  

“Novoe Vremya” ölkə rayonlarında mövcud siyasətə etiraz olan xalq üsyanlarına “ayrıca götürülmüş bir ölkədə oliqarxlaşdırmanın yekunu” mövqeyini ifadə edir. Bundan əlavə, qəzet bu etirazların toqquşmalarla müşayiət olunmasına “islahat, yoxsa qarşıdurma” münasibətini sərgiləyir.

“Bizim yol” İsmayıllı rayonunda baş vermiş xalq etirazları ilə bağlı çox sayda gəncin ev və iş yerlərindən həbs edilərək aparılmalarını “İsmayıllıda tuthatutun başlaması” kimi şərh edir. 

“Yeni Müsavat” İsmayıllı olaylarına görə nazir Füzuli Ələkbərovun və rayonun icra başçısı, qardaşı Nizami Ələkbərovun həbs edilə biləcəklərini yazır. 

Qəzet son vaxtlar ciddiləşən kütləvi etiraz aksiyalarını “oliqarx-feodal sisteminin fəlakətli böhranı” kimi qiymətləndirir. 

İsmayıllıda xalq üsyanı yatırıldıqdan sonra rayonda YAP-ın keçirdiyi toplantı ironiya ilə “YAP-ın “xalq qarşısına çıxması” adlandırılır. 

Yanvarın 19-da “Binə” Ticarət Mərkəzində sahibkarların keçirdiyi etiraz aksiyası ilə bağlı daha 10 nəfər saxlanılıb.