Mətbuat-Monitorinq 26.02.14

Rəsmi qəzetlər dövlət başçısı İlham Əliyevin Sumqayıt şəhərinə səfəri, bəzi obyektlərin açılışında iştirakı, bu şəhərin sosial-iqtisadi inkişafı ilə bağlı 5 milyon manatın ayrılması, AMEA prezidenti Akif Əlizadənin “İstiqlal” ordeni ilə təltif olunması haqda sərəncamlar imzalamasına dair xəbərləri ilk səhifəyə çıxariblar.  
   
“Azadlıq” qəzeti deputat Zeynəb Xanlarovanın rəsmi Bakıya edilən “xalqın ayağa qalxacağı” xəbərdarlığını ilk səhifəyə çəkib.
Fevralın 24-dən “Azadlıq” qəzetinin saytı total hücumlara məruz qalır və hücum “Yanukoviçin başına pul qoyuldu” məqaləsi üzərindən başlayıb.
Ekspertlər jurnalist Xədicə İsmayılın istintaqa cəlb olunmasını hakim ailə ilə bağlı araşdırmalarına görə “qisas alınması” kimi şərh edirlər.
2013-cü ilin “İsmayıllı olayları” ilə bağlı müttəhimlərə uzunmüddətli həs cəzasının gözlənilməsi rayonda yenidən gərginlik yaradıb.
“İnstagram”ın daha bir məmur oğlunu ifşa etdiyini yazan qəzet bu dəfə hədəfin “baş bankir” Elmar Rüstəmovun oğlu Elçin Rüstəmov olduğunu bildirir.
Ölkədə dini təhlükənin kifayət qədər əsaslı olduğunu deyən ekspertlər mövcud iqtidarın siyasi idarəetmə prinsiplərinin buna zəmin yaratdığını bəyan edirlər.
Ukrayna hadisələrini şərh edən rus politoloqlar “növbə Azərbaycanındır” qənaətlini ifadə ediblər.

“Ekspress” deputat Zeynəb Xanlarovanın Xəzər dənizi sahillərinin hasarlanmasına etiraz olaraq parlamentdəki bəyanatını ilk səhifədə yerləşdirib.
     
“Exo”  Bakıda mənzillərin təqribən 35%-nin icarəyə verilməsini və icarədarların illik qazancının 45 milyon manat olmasını önə çəkib.
       
“Novoe Vremya”  deputat Zeynəb Xanlarovanın parlamentdəki “mən qorxuram xalq ayağa qalxa” bəyanatını manjetə çıxarıb.
    
“Bizim yol” “dəniz sahillərinin hasarlanmasına etiraz olaraq “xalqın üsyana qalxacağı” haqda deputat Zeynəb Xanlarovanın bəyanatını “gündəmi dəyişən açıqlama” kimi dəyərləndirir.
Ölkənin neft sektorundakı ixtisarların gərginlik yaradacağını yazan qəzet ekspertlərə istinadən ARDNŞ-nin 66 min nəfərlik işçisinin hər birinin il ərzində şirkətə 330 min manat dollar qazandırdığını bildirir.
    
“Yeni Müsavat” deputat Zeynəb Xanlarovanın ölkə iqtidarına “xalq üsyanı” xəbərdarlığını ön səhifəyə çıxarıb.
“Xural” qəzetinin həbsdə olan redaktoru Əvəz Zeynallının xanımı Məlahət Zeynallı əfv üçün dövlət başçısına müraciət olunması haqda yayılan xəbərləri təkzib edib.
Bakının tarixi “Sovetski” məhəlləsinin söküləcəyi xəbərilə bağlı mənzil bazarında qiymətin “od tutub yanması”, kirayə evlər və tikinti materiallarının bahalaşması nəzərə çatdırılır.