Müəllim işini siyasi mövqeyinə görə itirdiyini bildirir

Xalq Cəbhəsi Partiyası (AXCP) Naxçıvan təşkilatının sədri Yaşar Bağırsoy Babək rayon Uşaq və Gənclər İdman Məktəbində tutduğu məşqçi-müəllim vəzifəsindən azad edilib. Bu haqda Y.Bağırsoy Turan-ın bölgə müxbirinə bidirib.
Y.Bağırsoy işdən azad olunması ilə bağlı Babək rayon təhsil şöbəsindən bu haqda məktub aldığını nəzərə çatdırıb. Məktubda Y.Bağirsoyun işdən azad olunmasına səbəb kimi “əmək funksiyasını yerinə yetirməməsi və rəhbərlik tərəfindən verilən intizam tənbehindən nəticə çıxarmaması” göstərilir və bu il fevralın 18-dən vəzifəsindən azd edildiyi bildirilir. Y.Bağırsoy rayon təhsil şöbəsinin bu qərarını “əsassız və qərəzli” adlandırıb. Hələ bu məktuba qədər məktəbin direktoru Y.Bağirsoya işdən azad olunması üçün “yuxarı”ların göstərişilə planlar hazırlanması haqda şifahi xəbərdarlıq edib. Y.Bağırsoy məktəb direktoru və Həmkarlar İttifaqının saxta təqdimatı əsasında rayon təhsil şöbəsinin qərar qəbul etdiyini nəzərə çatdırıb. Onun sözlərinə görə, bu qərar siyasi mövqeyilə bağlı verilib. Y.Bağırsoy hüquqları pozulduğu üçün məhkəməyə müraciət edəcəyini də söyləyib. Rayon təhsil şöbəsinin müdiri bu məsələyə şərh verəcəyini söyləsə də sonunda vədinə əməl etməyib.-05D-