Prezident İlham Əliyev Sumqayıtda kağız və karton istehsalat kombinatının, yağ fabrikinin açılışında iştirak edib

Fevralın 25-də prezident İlham Əliyev Sumqayıtda “Azərsun Sənaye Parkı”nın nəzdində yaradılan Azərbaycan kağız və karton istehsalat kombinatının  və Sumqayıt yağ fabrikinin açılışında iştirak edib.
Kağız və karton istehsalat kombinatı Sahibkarlığa Kömək Milli Fondu tərəfindən verilmiş güzəştli kredit və “Azərsun Holdinq” MMC-nin vəsaiti hesabına inşa olunub. Kombinatın illik emal gücü 50 min tondur. 150 nəfər işlə təmin edilib.
Hesablamalara görə, müəssisənin fəaliyyəti nəticəsində ildə 850 min şam ağacının kəsilməsinin və meşələrin məhv olmasının, həmçinin atmosferə xeyli miqdarda zərərli maddələrin buraxılmasının qarşısı alınacaq. Müəssisənin xammala tələbatının 90 faizi tullantı kağızın tədarükü hesabına ödəniləcək. Bu məqsədlə respublikanın regionlarında gündəlik 60-70 ton kağız tullantıları tədarük etmək imkanına malik olan 30 məntəqənin yaradılması nəzərdə tutulur. Layihənin reallaşdırılması bölgələrdə daha 1000 nəfərin işlə təmin edilməsinə imkan yaradacaq.
Sumqayıt yağ fabrikində xam yağ qəbulu, rafinləşdirmə bölmələri, marqarin paketləmə, duru yağ qablaşdırma, şokolad istehsalı, əridilmiş yağın qablaşdırılması və metal qablaşdırma sahələrindən ibarət 5 istehsal xətti quraşdırılıb. Fabrikdə illik 270 min ton yağ məmulatı, o cümlədən qarğıdalı, günəbaxan, marqarin yağları və əridilmiş yağlar, şokolad yağları və mayonezlər istehsal olunacaq. 250 yeni iş yeri yaradılıb və gələcəkdə iş yerlərinin sayının 700-ə çatdırılması nəzərdə tutulur.-03D-