Mətbuat-Monitorinq 27.04.13

Rəsmi və hökumətyönlü qəzetlər Avropa İttifaqının ictimai rəyin öyrənilməsi üzrə sorğusunda “əhalinin 92%-nin Azərbaycan hökumətinə inanması” “nəticə”sini ilk səhifəyə çıxarıblar. 

Bundan əlavə, bu qəzetlər mərhum dövlət başçısı Heydər Əliyevin 90 illik yubileyi ərəfəsində onu tərifləyən çoxsaylı məqalələr dərc ediblər.  Bu qəzetlərdə müxalifət qüvvələri, bəzi hüquq müdafiəçiləri, “Azadlıq” radiosu haqda təhqir və böhtan dolu yazılara yer verilib.

“Azadlıq” qəzeti ölkədə polad istehsalı kompleksinin kimin nəzarətində olacağı ilə bağlı PA rəhbəri Ramiz Mehdiyevlə “general” Bəylər Əyyubovun arasında qarşıdurma yaranmasını manjetə çıxarıb.

Avropa İttifaqının Bakı ofisinin rəhbəri Roland Kobia NİDA gənclər hərəkatı üzvlərinin bir qrupunun həbsini və rəsmi Bakının QHT haqqında qanuna etdiyi bəzi dəyişiklikləri əsassız adlandırıb.

İctimai Palata AŞPA üzvlərinə müraciət edərək avropalı deputatları Ştrasserin siyasi məhbuslar haqqında hesabatını yenidən gündəliyə salmağa çağırıblar. 

İslam Partiyası sədrinin müavini Rövşən Əhmədli xalqın 95%-nin hakimiyyətin əleyhinə olduğunu və “antidemokraitk seçki keçirməkdə, qanunları pozmaqda alternativi olmadığını” bəyan edib. 

“Zerkalo” 2011-ci ildən bu yana Azərbaycanda uşaqlara qarşı 105 zorakılıq faktının qeydə alındığını nəzərə çatdırır. 

“Ekspress” Vətəndaş və İnkişaf Partiyasının sədri Əli Əliyevin tanınmış ziyalı Rüstəm İbrahimbəyovun Rusiyanın təsiri altında olması ilə bağlı ittihamına “EL” Hərəkatı “Ə.Əliyev partiyasını iqtidarın idarə etməsinin qayğısına qalsın” cavabını verib.

“Novoe Vremya” Azərbaycan XİN başçısı Elmar Məmmədyarovun Qarabağ münaqişəsinin tənzimlənməsi məsələsində “danışıqlar prosesinin perspektivinin olmaması” bəyanatını ilk səhifəyə çıxarıb. 

“Yeni Müsavat” Rusiyada fəaliyyət göstərən ləzgi təşkilatının Avropa Parlamentində Azərbaycana qarşı separatçılıq təbliğatı aparmasını ilk səhifəyə çıxarıb. 

Müsavat Partiyasının sədr müavini Tofiq Yaqubluya qarşı 26 yanvar İsmayıllı hadisələrində iğtişaş və yanğınları təşkil etmək ittihamı irəli sürülüb.