Mətbuat-Monitorinq 27.08.13

Rəsmi və iqtidaryönlü qəzetlər dövlət başçısı İlham Əliyevin mədəniyyət, gənclər və idman sahəsində çalışanların əmək haqlarının 10%, fəxri adlara görə təqaüdlərin artırılması haqda sərəncamının mətnini ilk səhifələrə çıxarıblar.

Deputat Bəxtiyar Əliyev “Azərbaycan” qəzetində “Hərdəmxəyalın seçki sərgüzəştləri” adlı irihəcmli yazısında Rüstəm İbrahimbəyovun şəxsində müxalifəti aşağılayan yazı dərc etdirib. 

Bundan əlavə, bu qəzetlər Azərbaycanda seçkilərə heç bir aidiyyatı olmayan, seçki haqqında tələbi pozaraq vaxtından əvvəl təbliğata başlayan Qafqaz Xalqları Ali Dini Şurasının Azərbaycan ictimaiyyətinə İlahm Əliyevi dəstəkləmək müraciətini yayıb. 

“Azadlıq” qəzeti prezident seçkiləri yaxınlaşdıqca bu mövzuya geniş yer verir. Qəzet yazır ki, Milli Şuranın ehtiyat namizədi Cəmil Həsənlinin seçki qərargahına AXCP Ali Məclisinin sədri Həsən Kərimov və Müsavat Partiyası icra aparatının rəhbəri Arif Hacılı rəhbərlik edəcək. Ölkənin ictimai rəyinə təsir edən bir sıra nüfuzlu şəxslər C.Həsənlinin namizədliyini müsbət dəyərləndiriblər. 

İslam Partiyası qurumun seçkilərdə namizədi və həbsdə olan sədri Mövsüm Səmədovun namizədliyinin qeydə alınmamasına “iqtidarın qorxaqlığı” kimi yanaşacaq.    

Ekspertlər rəsmi Bakının ikinci rabitə peykini orbitə çıxarmaq səylərini daxili rəqiblərinə qarşı fəaliyyəti daha da gücləndirmək kimi şərh ediblər. 

Avqustun 5-də elektrik cərəyanının vurması nəticəsində ölən əsgər Tural Qazıyevin valideynləri bu versiyaya inanmadıqlarını bəyan ediblər. 

“Zerkalo” Müsavat Partiyasının başqanı İsa Qəmbərin prezidentliyə iddiasından geri çəkilməsini “kölgəyə keçməsi” kimi dəyərləndirir. 

“Ekspress” Rusiyanın bir qrup jurnlaist və ictimai xadimlərindən ibarət nümayəndə heyətinin Qarabağa səfər etdiyini, amma erməni tərəfin Bakının “qara siyahısı”na düşməmələri üçün səfərə gələnlərin adlarını açıqlamadığını yazır. 

“Exo” Azərbaycan tərəfin xəbəri olmadan Qarabağa səfərə gələn Rusiya nümayəndə heyətini “çağırılmamış qonaqların peyda olması” adlandırıb.

Müstəqil ekspertlər Azərbaycanda inflyasiyanın Avropadan 12 dəfə çox olduğunu, sadəcə dövlətin nəzarəti altında olduğu üçün hiss edilmədiyini nəzərə çatdırırlar. 

“Novoe Vremya” Azərbaycanda prezident seçkilərinin demokratik keçirilməyəcəyini “tunelin sonunda heç nə görünmür” qənaətilə ifadə edir.

“Bizim yol” nazir Yavər Camalovun qardaşı Əlikram Camalovun “Dəmirbank”a 4 milyon borcu olduğuna görə məhkəməyə verildiyini önə çəkir.

Bakının su və kanalizasiya sisteminin bərpası üçün 3.8 milyard manat vəsait ayrılsa da nəticənin olmamasını qəzet “Azərsu” 3.8 milyard manatı nəyə xərcləyib?” sualı ilə bəyan edir. 

Ekspertlərə görə, dərsliklərin anlaşıqlı hazırlanmaması üzündən uşaqların ilk sinifdən repetitora ehtiyacı yaranır. 

“Yeni Müsavat” rəsmi Bakının Milli Şuranın sədri Rüstəm İbrahimbəyovun keçmiş nazir Nicat Quliyevlə danışqlarını ələ keçirməsini, Bakıdakı ailəsinin istintaq altında olmasını, Bakıya gəlsə həbs ediləcəyini bildirir. 

Qəzetin yazdığına görə, həbsdə olan keçmiş nazir Fərhad Əliyevə seçkilərdə Cəmil Həsənlini dəstəkləməmək təklifini dövlət başçısının köməkçisi Əli Əsədov verib. 

Milli Şuranın vahid namizədi Cəmil Həsənlinin seçki qərargahının Müsavat Partiyasında yerləşdirilməsi qərara alınıb. Müsavat Partiyasının başqanı İsa Qəmbər partiyanın C.Həsənlinin namizədiyini dəstəkləməsini “bu gün və gələcək üçün ən doğru qərar” adlandırıb. 

“Bakı Xəbər” yazır ki, Milli Şuranı ölkədə təxribat törətmək hazırlığında ittiham edərək qurumdan çıxan Əflan İbrahimov adlı şəxs “seçkilərə qədər ictimaiyyətə Milli Şuranı dağıdacaq informasiyalar verəcəyi” barədə bəyanat səsləndirib.