Mətbuat-Monitorinq 27.10.15

Rəsmi qəzetlər dövlət başçısı İlham Əliyevin Sumqayıtda zavod açılışında iştirakı, qəbulları barədə xəbərləri ilk səhifələrdə yerləşdiriblər.

“Azadlıq” qəzeti MTN-in keçmiş şefi Eldar Mahmudovun mühafizəçilərinin həbsini, yaxın qohumu Bakı Telefon İstehsalat Birliyinin keçmiş rəhbəri Beytulla Hüseynovla bağlı cinayət işinin başlamasını ilk səhifəyə çıxarıb.

Ekspertlər “MTN işi” ilə bağlı 2 milyard dollar vəsaitin ölkədən çıxarılması və s. kimi rüsvayçı faktları yekun olaraq “Azərbaycan hökumətinin siması” kimi dəyərləndirir.

Ölkədə sahibkarlara qarşı qanunsuzluqların 10 illər boyu davam etməsini məlum məsələ sayan qəzet buna görə də MTN şefi E.Mahmudovun vurulmasını “dövlət maraqlarına yox, şəxsi maraqlara hesablanan iş” adlandırır.

Müxalif siyasilər “MTN işi” ilə bağlı üzə çıxan iş adamlarına təzyiqləri “neçə illər davam edən rəsmi siyasət”, sahibkarlarla bağlı imzalanan son fərmanlar isə “hakimiyyətin rüşvətxorluq və korrupsiyanı azaltmaq imitasiyası” kimi şərh edirlər.

Həbsdə olan REAL Hərəkatının rəhbəri İlqar Məmmədova təzyiqlər haqda danışan həyat yoldaşı bunun əfv ərizəsi yazdırmaq üçün edilidiyini söyləyib.

Qəzet yazır ki, iş adamı İbrahim Nehtəmlinin 100 milyardlıq “Xəzər adaları”  layihəsinin reallaşmasına Ekologiya Nazirliyi rəy verməyib, SOCAR isə iş adamına ərazidə tikinti aparılmasının yolverlməz olduğu haqda məktub ünvanlayıb.

“Goldman Sachs” İnvestisiya Bankının analitikləri neftin qiymətinin 2 dəfəyə qədər ucuzlaşacağı haqda proqnozlarını elan ediblər.

“Ekspress”  MTN-in keçmiş şefi Eldar Mahmudovun qohumu Beytulla Hüseynova qarşı cinayət işinin başlanmasını və MTN-in “mahmudovçulardan təmizlənməsi”ni diqqət mərkəzinə çəkib.

“Exo” son vaxtlar güclü küləklər zamanı ağacların yıxılaraq vətəndaşlara və onların əmlakına ziyan vurmasına görə hər hansı kompensasiyanın verilməməsinə     “Bakıda “qəzalı ağaclara görə” kim məsuliyyət daşıyır?” sualını gündəmə gətirir. 

Ekspertlərə görə, dövlət maliyyə qurumlarından kənar qeyri-formal köçürmələr səbəbindən dövlət sturkturları bütün maliyyə əməliyyatlarının 50%- i qədər itkiyə məruz qalıblar.

“Novoe Vremya”  Sənaye və iqtisadiyyat nazirinin müavini Sevinc Həsənovanın “Azərbaycan ona xeyir gətirəcək birliklərə üzv ola bilər” açıqlamasına “Azərbaycan Avrasiya İqtisadi İttifaqını seçir?” mövqeyini ifadə etməsini önə çəkib.

“Bizim yol”  dövlət başçısı İlham Əliyevin iş adamlarına mane olmaq istəyənlərə qarşı “cəza tədbirləri davam edəcək” bəyanatını ilk səhifəyə yerləşdirib.

Dini Komitənin birinci sədri Rafiq Əliyev bina tikintisinə qoyulan qadağanı qanunsuz sayması ilə bağlı dövlət başçısı və baş prokurora müraciət edib.

Neft Fondunun 9 aylıq fəaliyyətinə dair açıqlamalarına isnadən qəzet valyuta ehtiyatlarının 37 milyard dollardan 34 milyard dollara endiyini nəzərə çatdırır. 

“Yeni Müsavat” “MTN işi”lə bağlı məsələdə generalların ölkədəki kapitalı xaricə daşımasına Mərkəzi Bankın başçısı Elman Rüstəmovun mane olmadığına görə baş bankirin adının da bu işə qarışmasını önə çəkib.  

Qəzetin iddiasına görə, ölkədə parlament seçkilərindən sonra MTN-də daha geniş “təmizləmə”nin aparılacağı gözlənilir.

Qəzet keçmiş deputat Oqtay Əsədovun Rusiyadan olan jurnalistlərə “Azərbaycan Rusiya əleyhinə sanksiyalara qoşulmaqdan imtina etdiyinə görə Qərbin təzyiqlərinə məruz qalması” barədə bəyanat səsləndirib.