Avropa İttifaqı və Avropa Şurasının Azərbaycan üçün layihələri təqdim edilib

Bü gün Bakıda Holiday İnn hotelində Avropa Şurası və Avropa İttifaqının Azərbaycanda jurnalistlər, ədliyyə və inzibati orqan işçiləri, peşəkar hüquqşünaslar üçün nəzərdə  tutduğu layihələrin təqdimat mərasimi olub. Mərasimdə Azərbaycanın rəsmi orqanları, parlament nümayəndələri və QHT təmsilçiləri iştirak ediblər.

Azərbaycanda 2015-2017-ci illərdə “Proqramlı əməkdaşlıq haqqında” çərçivə sazişi əsasında reallaşacaq dörd layihənin əsas məqsədi KİV azadlığının və ifadə azadlığının genişləndirilməsi, inzibati orqanlarda rüşvətxorluqla mübarizə və rüşvətxorluğun qarşısını alma imkanlarının gücləndirilməsi, Ədliyyə Akademiyasının rolunun və imkanlarının artırılması, hakimlərə təhsil verilməsi, habelə Azərbaycanda ədliyyə xidmətlərinin səmərəsi və keyfiyyətinin yüksəldilməsinə həsr olunan xüsusi layihənin həyata keçirilməsidir.

4,7 milyon avro dəyərində olan layihələr Avropa İttifaqı və Avropa Şurası tərəfindən maliyyələşdirilir və Avropa Şurası tərəfindən həyata keçirilir. Bu layihələrdən əlavə Azərbaycan həm də bir neçə ölkəni əhatə edən 14 regional təşəbbüsdə iştirak edir.

Bununla yanaşı Azərbaycan Avropa İttifaqının regional layihələr paketinə daxil olan 2 milyon avro maliyyə vəsaitlərindən də istifadə edə bilər.

Avropa Şurası və Avropa İttifaqı “Şərq Tərəfdaşlığı” ölkələrində, o cümlədən Azərbaycanda 2020-ci ilədək 33 milyon avro dəyərində bir sıra layihələr həyata keçirəcək.

Bakıda Avropa Şurası ofisinin rəhbəri Draqana Filipoviç bildirib ki, layihələr insan hüquqları, qanunun aliliyi, informasiyalı cəmiyyətin qarşısında duran problemlər, məhkəmə sistemi, rüşvətxorluğa qarşı mübarizə, media və ifadə azadlığı sahələrini əhatə edir.

“Bu layihələr Azərbaycan hökuməti ilə əməkdaşlıq çərçivəsində həyata keçirilir. Layihələr yalnız Bakıda deyil, bir sıra rayonları, o cümlədən Gəncə, Şəki və başqa regionları da əhatə edəcək”, - o qeyd edib.

D. Fillipoviç layihələrin əməkdaşlığın və dialoqun genişlənməsinə töhfə verəcəyinə ümid edir. O, Nizami Gəncəvinin “Leyli və  Məcnun” poemasından “əgər bir olarsa dostun əməli, daşdan su çıxarar insanın əli” sitatını gətirərək 12-ci əsrdə belə Azərbaycanda əməkdaşlıq və dialoq ənənələrinin güclü olduğuna işarə edib. 

Avropa İttifaqının Azərbaycan nümayəndəliyinin rəhbəri Malena Mard bildirib ki, Aİ üçün “Şərq Tərəfdaşlığı” proqramının əhəmiyyəti böyükdür. Hazırda daha çox ehtiyaclara uyğunlaşmış siyasət həyata keçirilir.

“Layihələrə ayrılan vəsaitin 90 faizi Aİ, 10 faizi isə Avropa Şuraının payına düşür.  Layihə çərçivəsində 300 vəkil və 120 hakim Avropa məhkəməsində təlimlər keçəcək”, - o qeyd edib.  

M.Mard deyib ki, seçilmiş sahələr bütün “Şərq Tərəfdaşlığı” ölkələri üçün eyni dərəcədə əhəmiyyət kəsb edir. 

“Biz yaxından əməkdaşlıq etmədən müsbət nəticələr əldə edə bilmərik”, - Aİ nümayəndəsi bildirib.

Avropa Şurası və Avropa İttifaqı Şərq Tərəfdaşlığı Proqramları Əməkdaşlıq Çərçivəsi (PCF) üzrə milli əlaqələndirici, Azərbaycan Xarici İşlər Nazirliyinin əməkdaşı Həbib Mikayıllı deyib ki, layihələr ölkənin milli islahat proqramlarını dəstəkləməlidir və ölkənin spesifik xüsusiyyətləri nəzərə alınmalıdır.

“Layihələr Azərbaycan hökuməti ilə razılaşdırlmalıdır və yalnız Azərbaycanın dövlət orqanları ilə əməkdaşlıq şəraitində həyata keçirilə bilər. Əgər müvafiq dövlət orqanları hansısa mərhələdə layihələrdə dəyişiklik edilməsini lazım bilərsə müzakirələr aparılmalı  və dəyişikliklər edilməlidir”, - o vurğulayıb.

Öz növbəsində, PCF üzrə Avropa Şurasının əlaqələndiricisi Arkadi  Sytine deyib ki, layihələrin icrası nəticəsində sahələr üzrə irəliləyişlər izlənilməlidir.

“Hər hansı layihəyə dəyişiklik edilməsi üçün təhlillər aparılmalı və əsalandırılmalıdır. Layihələrə dəyişikliklər təhlillər əsasında olacaq”, - o qeyd edib.

Sonra “2015-2017 AŞ və Aİ Şərq Tərəfdaşlığı PCF illik əməkdaşlıq görüşü çərçivəsində aşağıdakı layihələrin təqdimatı olub:

- Avropa İnsan Hüquqları Konvensiyası və  Avropa İnsan Hüquqları Məhkəməsinin presedent hüququnun Azərbaycanda tətbiqi;  

- Azərbaycan məhkəmələrinin səmərəliliyinin artırılmasına və onun qarşısının alınmasına, hakimlərin təliminin təkmilləşdirilməsinə və məhkəmələrdə özünü idaretməyə dəstək;

- Azərbaycanda korrupsiya ilə mübarizə və onun qarşısının alınması sahəsində bacarıqların artırılmasına dəstək:

- Azərbaycanda ifadə və media azadlığı.-03C-