Mətbuat-Monitorinq 27.12.12

Rəsmi qəzetlər dövlət başçısı İlham Əliyevin Gürcüstanın baş naziri Bidzina İvanişvili ilə görüşünə dair xəbərləri ilk səhifəyə çıxarıblar. Qəzetə əfv fərmanının, Abşeron rayonunun bir sıra şəxslərinin dövlət mükafatları ilə təltif olunmaları haqda sərəncamların mətnləri dərc edilib.    

“Azadlıq” keçmiş deputat Gülər Əhmədovanın bu günlərdə saxlanması və azad edilməsu haqda xəbərləri “PA rəhbəri Ramiz Mehdiyevin əvvəl deputatı həbs etdirmək qərarını verməsi, sonra isə qərarını dəyişməsi” kimi şərh edib.

“Azadlıq” qəzetinin kollektivi  “Qasid” mətbuat yayımı qəzetin pullarını ödəmədiyi üçün bu gün firmanın önündə aksiya keçirməyə hazırlaşır. 

Dövlət başçısı İlham Əliyevin əfv fərmanını siyasətçilər növbəti “yarımçıq əfv fərmanı” adlandırıblar. 

Keçmiş nazirlər Əli İnsanov və Fərhad Əliyevin adının əfv siyahısına salınmamasını hüquq müdafiəçiləri “iqtidarın sabiq nazirlərdən qorxması” hesab edirlər. 

Azərbaycan ailələrində boşanmaların sayının artmasını qadın hüquq müdafiəçiləri  “ailə zorakılığı ilə bağlı olması” ilə şərh ediblər. 

Tanınmış kinoaktyor Rasim Balayev çıxışlarının efirə verilmədən silinməsinə “məni lent yazılarından silə bilərsiz, amma kino tarixindən silə bilməzsiniz” mövqeyini ifadə edib.    

“Zerkalo”  yazır ki, Bakıda səfərdə olan Gürcüstanın baş naziri İvanişvili Bakı-Tbilisi-Qars dəmir yolu əleyhinə bəyanatını “tələsik bəyanat” adlandırıb.

“Ekspress” dövlət başçısının əfv fərmanını “bayram əfvi” kimi dəyərləndirir.

Qəzet Azərbaycan Silahlı Qüvvələrinin döyüş gəmiləri alacağını yazır. 

“Exo”  ölkə paytaxtında bu il ən baha mənzillərdən birinin 1,2 milyon manata satıldığını yazaraq Bakıda ən bahalı yaşayış sahələrinin kvadrat metrinin 3,5-4 min manat olduğunu bildirir.  

“Novoe Vremya”  hakim Yeni Azərbaycan Partiyasının seçkilərdə indidən qələbə qazanmaları haqda bəyanatlarına ironik olaraq “tam sürətlə durğunluq və çürüməyə doğru” mövqeyini ifadə edir. 

“Bizim yol”. Şərti “milyarderlər ittifaqı”nın əsas fiqurlarından baş nazirin keçmiş müavini Abbas Abbasovun İlham Əliyevlə görüşünü Zeynal Nağdəliyev təşkil edib və o, iqtidarın bütün şərtləri ilə razılaşıb.  

“Yeni Müsavat” dövlət başçısı İlham Əliyevin şərti “milyarderlər ittifaqı”nın əsas fiqurlarından Abbas Abbasovu qəbul etməsini “iqtidarın ittifaqla danışıqlara başlaması” adlandırır.