Mətbuat-Monitorinq 28.11.14

Rəsmi qəzetlər dövlət başçısı İlham Əliyevin Cənubi Koreyanın baş nazirinin başçılıq etdiyi nümayəndə heyətini, Azərbaycana təyin edilən bəzi səfirlərin etimadnamələrini qəbul etməsi haqda xəbərləri ilk səhifələrə yerləşdiriblər.

Bundan əlavə, dini icmalara maliyyə yardımı ilə bağlı Dini Qurumlarla iş üzrə Dövlət Komitəsinə 2,5 milyon manatın ayrılması haqda sərəncamın mətni də bu qəzetlərdə əksini tapıb.

Avropa Parlamentinin rəhbəri Martin Şultsun Azərbaycanda insan haqları ilə bağlı bəyanatına PA-nın şöbə müdiri Novruz Məmmədov “Cənab Şults Azərbaycanla bağlı mənfi mövqe bildirmək üçün sanki fürsət axtarır” cavabını verib.

“Azadlıq” qəzeti bütün cəhdlərə baxmayaraq, OPEK-in neft hasilatını azaltmamasını manjetə çıxararaq bunu “neft diktatorlarına zərbə” adlandırır.

Hüquq müdafiəçisi Arzu Abdullayevanın alman qəzetinə şərhinə görə, Azərbaycanda siyasi repressiyalara səbəb “iqtidarın Ukraynadakı Maydan hadisələrinin təkrarlana bilməsi qorxusudur”.

İctimai fəallar rəsmi Bakının repressiya siyasətini “ölkəni radikallaşdırmağa aparan siyasət” kimi şərh edirlər.

Saxarov mükafatının təqdimatı zamanı Avropa Parlamentinin (AP) spikeri Martin Şultsun rəsmi Bakını hüquq müdafiəçisi Leyla Yunusu azad etmək çağırışına rəsmi Bakının mənfi reaksiyasını qəzet “AP ilə Azərbaycan arasında gərginlik” kimi dəyərləndirir.

Bakının Bülbülə qəsəbəsində kanalizasiya və yol problemilə bağlı 20 qadın aksiya keçirib.

Qarabağ müharibəsi qazisi Zaur Ağayev bələdiyyə seçkisinə qatılmaq istəyinə görə Sabirabadda polis təzyiqinə məruz qalır.

Gənclər və idman naziri  Azad Rəhimov “Hafka” ləqəbli iş adamı Hafiz Məmmədovun sahibi olduğu Fransanın “Lans” klubuna sponsorulq edəcək durumda olmadığını deyib.

Dərmanların qiymətlərinin dövlət tərəfindən tənzimlənməsini ekspertlər “dərman biznesinə zərbə” sayırlar.     

“Ekspress”  OPEK-in neft hasilatını azaltmamasının neftin dəyərinin 60 dollaradək enəcəyini önə çəkərək bunu “qiymət savaşının başlaması” sayır.

“Exo”  hər il Azərbaycanda zibilliklərdən yeni doğulmuş 3-4 çağanın tapılmasını önə çəkərək bu hərəkəti “atılmış həyat çiçəkləri” adlandırır.

Qəzet ölkədə vaxtı keçmiş kreditlərin artım sürətinin kreditləşmə həcmini üstələdiyini nəzərə çatdırır. 

“Novoe Vremya”  Ukrayna jurnalistlərinin Qarabağa icazəsiz səfərlərinə dair ikinci dəfə bəyanatla çıxış etməsini “qalmaqalın qızışmaqda davam etməsi” kimi dəyərləndirir.

“Bizim yol” keçmiş nazir müavini Mehman Səlimovun həbsinə hansısa məmurun mane olmaq istəməsini ilk səhifəyə çəkərək bunu “şok xəbər” adlandırır.

Qaraçuxur məscidindəki yanğınla bağlı araşdırma aparan qəzetin əməkdaşını məscidin axundu məcsiddən qovmaq üçün polis çağırıb.     

“Yeni Müsavat” həbsdə olan hüquq müdafiəçisi Leyla Yunusun səhhətinin kritik olmasını önə çəkərək bununla bağlı Azərbaycana qarşı sanksiyaların gündəmə gələ biləcəyini nəzərə çatdırır.

Ədliyyə Nazirliyinin Tibb İdarəsi Leyla Yunusun səhhətinin ağırlaşması ilə bağlı son vaxtlar mətbuatdakı açıqlamalara L.Yunus “tibbi xidmət və müayinədən imtina edib”cavabını verib.

Qəzet Qaraçuxur məscidində baş vermiş yanğınla bağlı Dini Komitənin “xarici amilin ola bilməsi” ehtimalı səsləndirməsinə diqqət çəkir və həm də məsciddə təmirin başa çatdığını, cümə namazının qılınmasına hazır olduğunu bildirir.