Mətbuat-Monitorinq 28.11.15

Rəsmi qəzetlər dövlət başçısı İlham Əliyevin Türkiyənin xarici işlər naziri Mövlud Çavuşoğlunu qəbul etməsi, Belarusa səfəri haqda xəbərləri ilk səhifələrdə yerləşdiriblər.

“Azərbaycan” qəzeti Nardaran hadisələrini təhlil edən yox, yalnız pisləyən 4 məqalə dərc edib.

“Respublika” qəzeti isə pisləyici məzmunlu 1 məqalə ilə çıxış edib.   

“Azadlıq” qəzeti noyabrın 26-da Bakının Nardaran qəsəbəsində keçirilən əməliyyatın nəticəsi olaraq gərginliyin hələ də yaşandığını diqqətə çatdırır.

Milli Şura yaydığı bəyanatla noyabrın 26-da Nardaranda polisin keçirdiyi əməliyyat vaxtı 6 vətəndaşın həlak olmasını “böyük faciə” sayır, onları “zülmün, ədalətsizliyin, səriştəsizliyin, dövlət məsuliyyətsizliyinin qurbanları” adlandırır.

AXCP sədrinin müavini Nurəddin Məmmədli Nardaranda baş verən hadisələri “hakimiyyətin yürütdüyü yarıtmaz siyasətin nəticəsi” kimi dəyərləndirir.

Hüquqşünaslar Nardaran olayları ilə bağlı hüquq-mühafizə orqanlarının məlumatlarını “hüququn təqsirsizlik prezumpsiyasına tüpürmək”, “DİN və prokurorluqdan hüquqa həqarət” adlandırıblar.   

Demokratik qüvvələrin təmsilçilərini saxta ittihamlarla həbsə alan siyasilər bu fonda hakimiyyətin Nardaran olayları haqda açıqlamalarına “bu hakimiyyətə inanmaq olarmı?” şübhələrini ortaya qoyurlar. Nardaran hadisələri zamanı həbs edilənlər Cinayət Məcəlləsinin qətl, terrorçuluq, odlu silahdan istifadə, kütləvi iğtişaş, qanunsuz silah əldə etmək, hakimiyyəti zorla ələ keçirmək, silahlı birləşmələr yaratmaq kimi hər biri ömürlük cəza nəzərdə tutan maddələrlə ittiham edilirlər.

“Ekspress” dövlət başçısı İlham Əliyevin Türkiyənin xarici işlər naziri M.Çavuşoğlu ilə görüşdə Türkiyə ilə Rusiya arasında gərginliyin artmasından təəssüf hissi keçirməsi haqda bəyanatını önə çəkib.  

Nardaranda yaşanan ictimai gərginliyə əlavə olaraq bu situasiyada “Azərişıq” “abonentlər borclarını ödəmirlər” adı ilə bütün qəsəbəyə verilən elektriki kəsib.

“Novoe Vremya”  son vaxtlar gərginləşən Rusiya-Türkiyə münasibətləri fonunda “Bakı-Tbilisi-Qars dəmiryolunun region uğrunda mübarizədə geosiyasi oyunların episentrinə düşməsini” ilk plana çıxarıb.

Qəzetin iddiasına görə, “Azəriqaz” ilə “Azəristiliktəhcizat arasında” “kimin kimə borclu olması” məsələsi ilə bağlı istixanaların qızdırılması üçün qaz verilmir.

“Bizim yol” Nardaran qəsəbəsində işıqların kəsilməsini, Gəncədə Taleh Bağırzadənin iki tərəfdarının silahla həbs edilməsini ilk səhifədə yerləşdirib.

“Sevil massivi” mənzil-tikinti kooperativinin mənzil tikintisi adı ilə fırıldaqlarından əziyyət çəkən vətəndaşlar dekabrın 1-nə Prezident Administrasiyasının önünə aksiya təyin ediblər.

“Yeni Müsavat” silsilə və ağır cinayətlərə görə 2005-ci ildə ömürlük həbs alan cinayətkar dəstənin başçısı Hacı Məmmədovun istintaqının yenilənməsi, onun içəridən cinayət işində adı keçərək ömürlük cəza alan DİN Cinayət-Axtarış İdarəsinin rəisi Zakir Nəsirovun günahı olmaması xəbəri göndərməsini ilk səhifəyə çəkib.

Qəzet “MTN işi” çərçivəsində həbsə alınan generalların baş prokuroru “devirmək” planının üstünün açıldığını diqqət mərkəzinə çəkib.

Ədliyyə Nazirliyinin qəzetləri iki ay bağlamaq hüququnu media ekpsertləri “media üzərində nəzarəti gücləndirmək əsas məqsəddir” kimi izah ediblər.

Postsovet məkanını Rusyanın ərazisi sayan deputat Yevgeni Fyodorov Rusiyanı həmin əraziləri ələ keçirməyə çağıraraq bunu “işğalçılıq yox, müdafiə və bərpa” kimi şərh edib.