Mətbuat-Monitorinq 29.08.13

Rəsmi və iqtidaryönlü qəzetlər dövlət başçısı İlahm Əliyevin qəbulları, Buzovnada orta məktəbin açılışında iştirakı, müharibə əlillərinə, şəhid ailələrinə verilən təqaüdlərin və prezident təqaüdünün artırılması, Milli qəhrəmanların sosial müdafiəsinin gücləndirilməsi haqda ərəncamlarının mətnlərini dərc ediblər.     

YAP-ın orqanı olan “Yeni Azərbaycan” qəzeti 6-7-ci səhifələrini bütünlüklə ölkənin etiraz elektoratının birliyi olan Milli Şuranı və qurum rəhbərliyini, quruma daxil olan aparıcı müxalifət partiyalarını qaralama kampaniyasına həsr edib. 

“Azadlıq” ölkənin etiraz elektoratının birliyi olan Milli Şura rəhbərliyinin prezident seçkiləri öncəsi Qərb diplomatları ilə görüşünü, “AZAL” konserninin rəhbəri Cahangir Əsgərovun bununla bağlı görüş keçirilən məkanın idarəçilərinə müxalifətçilərə görüşə icazə verdiklərinə görə etiraz etməsini önə çəkib. 

Milli Şura seçkiöncəsi ilk təbliğat mitinqini sentyabrın 15-də keçirmək barədə qərar qəbul edib. 

Qəzet ABŞ ekspertlərinə istinadən Xəzərin Azərbaycana aid hissəsində 6,8 milyard barel neft, 1,5 trln. kub metr qaz ehtiyatı olduğunu bildirir.  

“Zerkalo” Azərbaycanda fəaliyyət göstərən Qərb missiyalarının rəsmi Bakıya seçkiləri şəffaf və etimad bəslənilən şəkildə keçriməsi çağırışı etməsini ilk səhifəyə çıxarıb.

“Ekspress” təhsil naziri Mikayıl Cabbarovun “müəllimlərin işə qəbul olunması üzrə müsabiqənin nəticələrinin o qədər də ürəkaçan olmaması” haqda bəyanatını ilk səhifədə yerləşdirib.

Güney Azərbaycan ərazisində yerləşən Urmiya gölü ilə bağlı ekspertlər “quruma bu sürətlə davam edərsə bir ilə bu göl xəritədən silinəcək” bəyanatını veriblər. 

“Exo”  2013-cü ilin avqustunda ölkənin əmək qabiliyyətli əhalisi üçün istehlak səbətinin dəyəri 411,87 manat təşkil etməsi xəbərini önə çəkib. 

“Novoe Vremya” ölkədəki Qərb missiyalarının rəsmi Bakıya demokratik seçki çağırışına “demokratik seçkilərə çağırış: o eşidiləcəkmi?” şübhəsini ifadə edir. 

“Bizim yol”  nazir Füzuli Ələkbərovun müavini İlqar Rəhimovun ona qarşı mətbuatda kampaniya aparılması iddiası ilə dövlət başçısına şikayət edib. 

İslam Partiyası hazırda ölkə həbsxanalarında 70-ə qədər dindarın olduğunu və bununla bağlı gələn həftə Dindarların Vahid Müdafiə Komitəsinin yaranacağını bəyan edib. 

“Yeni Müsavat” Milli Şuranın (MŞ) vahid namizədi Cəmil Həsənlinin və qurum rəhbərliyinin Londona dəvət olunmasını önə çəkərək “Qərbin MŞ-ni “Rusiya layihəsi” olmaqdan çıxarması” kimi şərh edir. 

MŞ-nin icra aparatının rəhbəri Eldar Namazov qurumun maliyyə vəsaiti əldə edə bilməsi üçün Milli Şura sədri Rüstəm İbrahimbəyovun təklif etdiyi “1 manat” kampaniyasına ciddi ehtiyacın olduğunu açıqlayıb.  

Böyük-Şor qəsəbəsində evləri uçurulan 15 ailənin hər birinə 10 min manat pul verilib və ailələr “bu pula ev almaq olar?” sualı ilə üz-üzə qalıblar.