Mətbuat-monitorinq 31.10.15

Rəsmi qəzetlər iqtidarın ölkə həyatının bütün sahələrində “uğurlu siyasəti”nə dair məqalə və yazıları ilk səhifələrdə yerləşdiriblər.

Bu qəzetlərdə ölkə mətbuatının gündəmini bir xeyli müddətdir ki, zəbt edən “MTN işi” barədə hər-hansı məqalə, mövqe ifadə edən yazılar belə yoxdur.  

“Azadlıq” qəzetinə görə, nəqliyyat naziri Ziya Məmmədovun bir müddət hakimiyyətin qəzəbinə gəlməsi MTN-in keçmiş şefi Eldar Mahmudovun onu satması olub və qəzet bu iddianı önə çəkib.

5 aydır ki, maaşlarını ala bilməyən “Azərinşaatservis”in fəhlələri aclıq aksiyasına başlayıblar, aksiyanın maaşlar tam verilənə kimi davam edəcəyini bildirirlər.

Qəzetin iddiasına görə, rəsmi Bakının Azərbaycandakı “Gülen şəbəkəsi”nə loyal yanaşması Əliyevlə Erdoğanı üz-üzə qoyub.

Qəzet Türkiyə mətbuatında Azərbaycan mətbuatının bərbad durumda olması haqda material dərc edildiyini nəzərə çatdırır.

Avropa Şurası insan haqları komissarı Nils Mujnieks Azərbaycanın beynəlxalq təcriddən azad ola bilməsinə yeganə şans kimi “demokratik dəyərlərə sadiqlik nümayiş etdirməyi və bütün siyasi məhbusları azad etməyi” təklif edir.

Qərb mediası Azərbaycanda ictimai-siyasi durumu təhlil edən yazılar dərc ediblər.

“MTN işi”lə bağlı olaylar neft gəlirlərinin kəskin azalması və Azərbaycan hakimiyyəti daxilində gərginliyin yaranması ilə izah edilir.

“The Economist” jurnalı neft pullarının kəskin azalmasının ölkəyə qeyri-müəyyən iqtisadi gələcək vəd etdiyini və bunun gözlənilməz siyasi və sosial nəticələri ola biləcəyini yazır.

“Bloomberg” neftin qiymətləri qalxmadığı halda durumun daha da pisləşəcəyini, rəsmi Bakının 2016-cı ildə ikinci devalvasiyaya gedəcəyini bəyan edir.

“Ekspress” qəzeti leysan yağışlar nəticəsində Lənkəranda körpülərin uçduğu, yolların bağlandığı, insanların köçürüldüyü haqda xəbəri diqqət mərkəzinə çəkib.

Qəzet rəsmi Bakının məhdud sayda müşahidəçilərlə parlament seçklərini müşahdiə etməsi haqda yeni təklifini ATƏT/DTİHB-nin rədd etdiyini bildirir.

“Bizim yol” qəzeti ölkədə “İpoteka Fondu” ASC yaradılmasını, ipoteka kreditilə bağlı şərtlərin yüngülləşməsini “ipoteka inqilabı” kimi ilk səhifəyə yerləşdirib.

1997-2012-ci illərdə DİN tibb  xidməti sistemində çalışmış Xocalı qaçqını Solmaz Quliyeva DİN Tibb İdarəsinin rəisi Samir Quliyev tərəfindən 2012-ci ildə döyüldüyü, işdən çıxarıldığı, işə bərpa üçün 20 min manat rüşvət istənildiyi haqda mətbuata müraciət ünvanlayıb, DİN mətbuat xidməti bunu təkzib edir.

Qəzet ölkə ərazisindək əkin torpaqlarının 34, yay otlaqlarının 70, meşələrin 26%-nin eroziyaya məruz qaldığını nəzərə çatdırır.

“Yeni Müsavat ” qəzeti “MTN işi”lə bağlı mövzunu önə çəkərək, buradakı bir dəstənin ən strateji sirləri yaymağa hazırlaşdığını və cəmiyyətdə xaos yaratmaq istəməsi iddiasını ilk səhifəyə çəkib.

Qəzet Rusiya politoloqu A.Piantokovskiyə isnadən Azərbaycanın Avropa Birliyinə qoşulmaması üçün Kremlin işğaldakı rayonları Azərbaycana qaytarmaq təklifi edəcəyini bildirir.

Ağcabədi rayonunda bir qrup sahibkar tender adı ilə rayon icra hakimiyyətinin milyonlarla vəsaiti mənimsədiyini, hazırda isə 120 sahibkara məxsus torpaqları əllərindən almaq istədiklərini yazır.

Politoloq Ərəstun Orucluya görə, Tehran-İrəvan-Tbilisi-Moskva anlaşması Azərbaycanın təklənməsi prosesidir və Qərb bu durumda Azərbaycanı müdafiə etmək fikrində deyil.