MHİ Mehman Hüseynovun dərhal azadlığa buraxılmasını tələb edir

  “Bloger Mehman Hüseynovun 2 il müddətinə azadlıqdan məhrum edilməsi hakimiyyətin Azərbaycanda darmadağın etdiyi ifadə azadlığının qalan azacıq imkanlarını məhv etməkdə israrlı olduğunun göstəricisidir”, - bu barədə Media Hüququ İnstitutunun (MHİ) bəyanatında bildirilir.

Bəyanatda vurğulanır ki, Daxili İşlər Nazirliyinin rəhbərliyinin təşəbbüsü ilə Cinayət Məcəlləsinin bədnam 147-ci maddəsiylə başladıqları böhtan ittihamı əsasında verilmiş bu hökm sifarişlidir. MHİ hesab edir ki, həbs bilavasitə M.Hüseynovun “Sancaq” blogunda yaydığı, hakimiyyətin yuxarı eşalonunda olanların korrupsiya əməlləri, yanlış siyasətləri barədə geniş auditoriya qazanmış tənqidi videomaterialları və şərhləri ilə bağlıdır.

“Bu qanunsuz hökm bir daha hökumətin yüksək səviyyədə “Azərbaycanda heç kim ifadə azadlığına görə həbs cəzasına məhkum edilmir. Cinayət Məcəlləsinin böhtan və təhqirə görə ağır cəzalar nəzərdə tutan 147 və 148-ci maddələriniin tətbiqinə moratorium qoyulub”, məzmununda bəyanatlarının həqiqəti əks etdirmədiyini bir daha sübut edir”, - bəyanatda qeyd olunur.

Bəyanatda deyilir ki, bu həbs həm də onu göstərir ki, hökumət fundamental insan haqlarını pozarkən bunu başqa bəhanələrlə pərdələmək ehtiyacı duymur və açıq-saçıq davranmaq yolunu tutub.

MHİ hakimiyyəti M.Hüseynovu həbsdən dərhal azad etməyə, hər kəsin ifadə azadlığını təmin edən qanunların gerçəkdən təmin olunması üçün normal şərait yaratmağa çağırır.–06D-