Mina partlaması nəticəsində ANAMA əməkdaşı xəsarət alıb

Mayın 28-də Ağdam rayonunun Sırxavənd kəndi (Bakıdan 333 kilometr qərb) ərazisində Minatəmizləmə Agentliyinin (ANAMA) əməkdaşı Hasil Yusubov (1997-ci il təvəllüdlü) xidməti vəzifəsini yerinə yetirərkən piyada əleyhinə minanın partlaması nəticəsində xəsarət alıb. ANAMA-nın məlumatına görə, onun sol ayağı topuq nahiyəsindən amputasiya olunub. 

"Xəsarət alan əməkdaş rayon xəstəxanasına təxliyə edilib. Vəziyyəti qənaətbəxşdir", deyə məlumatda qeyd edilib.

ANAMA-nın məlumatına görə, 1991-ci ildən bəri 3429 şəxs mina qurbanı olub ki, onların 358-i gənc və ya uşaq, 38-i qadındır.

Rəsmi məlumatlara görə 2020-ci ildəki 44 günlük müharibədən sonrakı dövrdə ümumilikdə 362 nəfər Azərbaycan vətəndaşı mina qurbanına çevrilib. Onlardan 53 nəfər mülki şəxs, 15 nəfər hərbi qulluqçu olmaqla, 68 nəfər həlak olub. Daha 127 mülki şəxs və 167 hərbiçi müxtəlif dərəcəli xəsarətlər alıb.