M.Mürsəlov: Qardaşım məmur biganəliyinin qurbanı oldu

Cəlilabad rayon sakini, Qarabağ müharibəsi və 20 Yanvar hadisələrinin iştirakçısı Mirtahir Mürsəlov mayın 19-da özünü rayon polis şöbəsinin binası önündə yandırıb.

Mirşamil Mürsəlov qardaşını dərhal Bakıya gətirərək 5 saylı xəstəxanaya yerləşdirsə də, həkimlər onun həyatını xilas edə bilməyib. Mayın 20-si günorta saatlarında M.Mürsəlov həyatını itirib. M.Mürsəlov Turan-ın müxbirilə söhbət etdiyi günorta saatlarında qardaşının nəşini morqdan çıxararaq dəfn üçün rayona yola düşdüyünü deyib.

İntiharın səbəblərinə gəlincə, M.Mürsəlov qardaşının bir qrup rayon sakinilə mübahisəsi düşdüyünü, bu şəxslərin fiziki zorakılığına məruz qaldığını söyləyib. Bu haqda rayon hüquq-mühafizə orqanlarına dəfərlələ müraciət etsə də şikayətinə baxılmayıb. M.Mürsəlov bu şəxslərin “pul gücünə” qardaşının şikayətini örtbasdır edə bildiklərini söyləyib. Elə bu məmur biganəliyinin də Qarabağ müharibəsi iştirakçısını intihara srüklədiyini söyləyib. 

Qarabağ Qazilər Birliyindən Turan-a verilən xəbərə görə, M.Mürsəlov rayonda narkotik satan bir qrupun təqiblərinə, hətta fiziki zorakılıqlarına məruz qalıb. Hər dəfə də M.Mürsəlov fiziki zorakılığa məruz qalması haqda hüquq-mühafizə orqanlarına müraciət edib, amma müraciəti cavabsız, araşdırılmamış qalıb. Bütün bu etinasızlıqlara cavab olaraq M.ŞMürsəlov özünü yandırmağa qərar verib.

Müsavat Partiyası Cəlilabad təşkilatının sədri Hidayət İsmayıl bu intiharı ölkədə vətəndaş taleyinə məmur biganəliyinin növbəti qurbanı adlandırıb. Onun fikrincə, bu intihar həm də ölkədə rüşvət və korrupsiyanın insanların taleyini həll etməsi nümunəsi kimi dəyərləndirib. Təşkilat sədri rayon rəhbərliyini rayona rəhbərlik edə bilməməkdə ittiham edib. Bütün ölkədə olduğu kimi Cəlilabadda da vətəndaş hüququnun sözdən başqa bir şey olmadığını vurğulayıb. -05B-