Monitorinq Mərkəzi rəsmi Bakını jurnalistlərə təzyiqdə ittiham edir

“Siyasi Məhbusların Monitorinq Mərkəzi” (SMMM) ölkədə müstəqil jurnalistlərin təqibə məruz qalmasına etiraz bəyanatı yayıb.   

Müəlliflər iqtidarı uzun illər müstəqil mətbuata qarşı ayrı-seçkilik siyasəti aparmaqda, hazırda isə açıq-aşkar təzyiq kampaniyası yürütməkdə suçlayırlar.

Bəyanatda jurnalist Seymur Həzi üzərində məhkəmə prosesi keçiridiyi xatırladılır. Bundan əlavə, jurnalist Xalid Qarayevin, Rauf Mirqədirovun həbsdə olması, “Ayna” – “Zerkalo” qəzetinin bağlandığı vurğulanır. Sənəddə bloger Mehman Hüseynovun ölkədən çıxışına qadağa qoyulması, jurnalist Fərahim İlqaroğlunun zorakılığa məruz qalması, İdrak Abbasın ölkəni tərk etməyə məcbur olması nəzərə çatdırılır. “Müstəqil mediaya qarşı təqiblər, məmur özbaşınalığı davam edir və rəsmi Bakı tərəfindən dəstəklənir”, -deyə ölkədə müstəqil jurnalsitlərə qarşı özbaşınalıqların iqtidar tərəfindən sanksiyalaşdırıldığı iddia edilir. Bəyanatda jurnalistlərin ölkədən çıxmasına qoyulan qadağaların əsaslandırılmadığı bildirlir.

Son olaraq, araşdırmaçı jurnalist Xədicə İsmayıla qarşı tətbiq edilən məhdudiyyətlər bəyanatda yer alır. ABŞ-da Azərbaycanla bağlı keçirilən dinləmələrə qatılmasının qarşısının alınması üçün ölkədən buraxılmadığı bildirilir. Müəlliflər X.İsmayılın adının rəsmi Bakının “qara siyahısı”nda yer almasına diqqət çəkərək, bunu jurnalistin hüquqlarının ciddi şəkildə pozulması sayırlar. Müəlliflər ölkə ictimaiyyətini X.İsmayılın müdafiəsinə çağıraraq, həm də iqtidara jurnalistə qarşı qaralama kampaniyasına son qoymaq çağırışı edirlər.

“Siyasi Məhbusların Monitorinq Mərkəzi” ictimai birliyini keçmiş siyasi məhbus Elşən Həsənli 2014-cü ilin sonlarında təsis edib. -05D-