Müdafiə Komitəsi: Bu, artıq qisasdır

Martın 14-də keçmiş müstəntiq Rüfət Səfərovun Hüquqlarını Müdafiə Komitəsinin iclasi keçirilib.

İclasda əsasən R.Səfərova həbsxanada olan təzyiqlər və bu təzyiqlərin qarşısnın alınması tədbirləri  müzakirə edilib.

Komitənin sədri Eldəniz Quliyev 9 saylı həbsxanada iki aydır ki, cəza çəkən R.Səfərovun iki dəfə “kars”a salındığını söyləyib və bunu məhbusa qarşı işgəncə kimi dəyərləndirib: “Cəzaçəkmə müəssisələri artıq cəza və ya islah müəssisəsi deyil, daha çox işgəncə obyektinə dönür, bu, dövlətçiliyin özü üçün təhlükə mənbəyidir”.

Komitə sədri R.Səfərovun iki dəfə karsa salınmasının əsassız adlandırıb,  bunu hakimiyyətin R.Səfərova qarşı qisası kimi dəyərləndirib: “R.Səfərovu əsassız olaraq karsa salırlar, bu, azmış kimi, yeməkdən, yatacaqdan məhrum edirlər, ona qarşı təxribatlar törədirlər. Bu isə təbii ki, onun həyatına görə narahatlıq yaradır”.

Komitə sədri bildirib ki, R.Səfərova belə münasibət həm də onun valideynlərinə narahatlıq yaradır.

Məhbusun atası Eldar Sabiroğlu R.Səfərova qarşı olanları  hakimiyyətin qisası kimi dəyərləndirərək ortada oğlunu məhv etmək və ya qapalı həbsxanaya köçürmək planlarının ola biləcəyini vurğulayıb.

E.Quliyev R.Səfərova olan təzyiqlərlə bağlı MK adından bəyanat yayılacağını nəzərə çatdırdı.

Bundan əlavə, daha bir müraciət ölkədəki xarici ölkələrin səfirliklərinə və beynəlxalq qurumlara ünvanlanıb.

Beynəlxalq qurumlara ünvanlanan müraciətdə ölkədə “repressiya maşını”nın işə düşdüyü, 160-a qədər şəxsin siyasi motivlərlə həbsə alındığı və R.Səfərovun da  siyasi məhbuslardan biri olduği vurğulanır.

Bununla yanaşı, ölkədə belə durumun olmasına baxmayaraq, beynəlxalq qurumların bu duruma səssiz qalmaları da tənqid edilir. 

Xatırladaq ki, Zərdab Rayon Prokurorluğunun müstəntiqi R.Səfərov 2015-ci il dekabrın 20-də bəyanat yayaraq prokurorluq orqanlarından istefa verib. Dekabrın sonlarında saxlanılaraq təkrar rüşvət almaq bəhanəsilə Binəqədi Rayon Məhkəməsi tərəfindən barəsində 3 aylıq həbs qətimkan tədbiri seçilib. 2016-cı il yanvarın 22-də həbs qətimkan tədbiri ev dustaqlığı ilə əvəz edilib.

2016-cı il sentyabrın 6-da Lənkəran Ağır Cinayətlərə dair Məhkəməsinin qərarı ilə 9 il müddətinə azadlıqdan məhrum edilib.   –0--