Müdafiə Nazirliyi 8 hərbiçinin həlak olduğunu təsdiq etdi (YENİLƏNİB)

Müdafiə Nazirliyinin mətbuat xidməti avqustun 1-də günün ikinci yarısında cüməyə keçən gecə Qarabağın şimalında 8 hərbiçinin həlak olması faktını təsdiq edib.

Həlak olanların adlarını açıqlamayan və baş verənlər haqqında ətraflı məlumat verməyən mətbuat xidməti bu qədər çox itki olduğunu etiraf edib.

Bir müddət əvvəl həmin mənbə Ağdam və Tərtər rayonlarının kəsişməsində ermənilərin diversiya həyata keçirmək cəhdi etdiyi, bu cəhdin qarşısının alındığı barədə məlumat yayıb.

Qərb sərhədində vəziyyət gərginləşib, burada da həlak olan hərbiçi var.

Bu itkilərlə əlaqədar “Ümid” partiyası ölkədə matəm elan etmək haqqında müraciət yayıb.

Parlamentin bir sıra deputatları telekanalları əyləncə verilişlərini təxirə salmağa çağırıblar. -03В-

2014 Avqust 01 (Cümə) 14:09:13

Hələlik Müdafiə Nazirliyi Qarabağın şimalında gedən döyüşlərdə Azərbaycan tərəfindən itkinin sayını dəqiqləşdirməyib.

Hökumətyönlü KİV ötən gecə Qarabağda 9 hərbçinin həlak olduğunu bildirib.

Müdafiə Nazirliyi bu məlumatı nə təkzib edir, nə də təsdiq.06D--

2014 Avqust 01 (Cümə axşamı) 10:58:14

İylun 31-dən avqustun 1-ə keçən gecə erməni kəşfiyyat-təxribat qrupları Ağdam və Tərtər rayonları ərazisində qoşunların təmas xəttini keçməyə cəhd göstəriblər. Bu barədə Müdafiə Nazirliyinin mətbuat xidmətinin məlumatında deyilir.

Mətbuat xidməti bildirir ki, Azərbaycan Silahlı Qüvvələrinin bölmələrinin sayıqlığı nəticəsində düşmənin səngərlərə yaxınlaşması qabaqcadan aşkar edilərək təxribatın qarşısı alınıb. Şiddətli atışmadan sonra erməni bölmələri xeyli itki verərək geri çəkilməyə məcbur edilib.

Azərbaycan Silahlı Qüvvələrinin bölmələri də itki verib. Mətbuat xidməti itkilər barədə məlumat vermir.

Mətbuat xidmətinin digər məlumatında isə deyilir ki, iyulun 31-də Ermənistan-Azərbaycan sərhədinin Qazax rayonu ərazisində düşmənlə döyüşdə Silahlı Qüvvələrin Qazax rayonundan hərbi xidmətə çağırılmış giziri İsa Almazov düşmən tərəfindən açılan atəş nəticəsində şəhid olub.-03D-