Bakıda Azərbaycan-İran biznes forumu keçiriləcək

Avqustun 7-də Azərbaycan və İran sahibkarları hökumət səviyyəsində yenidən görüşəcək. Sonuncu dəfə iki ölkənin özəl sektor təmsilçilərinin iştirakı ilə biznes forumu bir neçə il əvvəl keçirilmişdi.

Forumu İqtisadiyyat və Sənaye Nazirliyinin dəstəyi ilə Azərbaycanda İxracın və İnvestisiyaların Təşviqi Fondu (AZPROMO) təşkil edib. Tədbirdə ticarət, qida sənayesi, kənd təsərrüfatı, mühəndislik, tikinti və tikinti materiallarının istehsalı, nəqliyyat, dənizçilik və logistika, kimya məmulatlarının istehsalı, səhiyyə, İKT, konsaltinq və digər sektorları təmsil edən 50-yə yaxın İran şirkəti iştirak edəcək, deyə Fondun məlumatında bildirilir.

Azərbaycanda xarici kapitalın iştirak etdiyi 6870 şirkət fəaliyyət göstərir. Bunun 5,6%-i İran kapitalını təmsil edir.

2013-cü ildə iki ölkə arasında əmtəə dövriyyəsi $280 mln olub. Əmtəə dövriyyəsinin saldosu İranın xeyrinədir - $134,4 mln. İrandan $207,6 mln məbləğində mal gətirilib. Bu, əvvəlki ildəkindən 17,7% çoxdur. İrandan əsasən klinker və sement, meyvə-tərəvəz, mineral gübrələr, polietilen və polivinilxlorid və s idxal olunur. Azərbaycandan İrana qaz və elektrik enerjisi ixrac edilir.

Bu ilin I yarısında iki ölkə arasında idxal-ixrac əməliyyatlarının həcmi $94 mln olub. Bu, 2013-cü ilin eyni dövründəkindən $46 mln azdır.

İran şirkətləri 2013-cü ildə Azərbaycan iqtisadiyyatına investisiyaları artırıb. İl ərzində $123,8 mln sərmayə qoyulub. Bu, 2012-ci ildəkindən 54% çoxdur. 2010-2011-ci illərdə İran Azərbaycana investisiya qoymayıb. 08B