Müdafiə Nazirliyi ermənilərin canlı qüvvəsinin və texnikasının məhv edildiyini bildirib (YENİLƏNİB)

Saat 13:00-da Azərbaycan Müdafiə Nazirliyi cəbhə xəttində hərbi əməliyyatların davam etdiyini bildirib.

Eyni zamanda bildirilir ki, düşmən müdafiəsinin ön xəttində və dərinliyində cəmləşən hərbi hədəflərin koordinatları əvvəlcədən müəyyənləşdirilib, atəş gücü vasitəsilə edilən həmlələr nəticəsində düşmənin döyüş texnikası, xeyli sayda canlı qüvvəsi və digər hərbi infrastrukturu sıradan çıxarılıb.-02D-

2016 Aprel 02 (Şəmbə) 11:09:59

Saat 11:00 radələrində  Azərbaycan Müdafiə Nazirliyi aprelin 2-nə keçən gecə Qarabağ cəbhəsi boyunca genişmiqyaslı hərbi əməliyyatların olması barədə məlumatı təsdiqləyib. Əməliyyatlar zamanı artilleriyadan istifadə edilib.

Buna erməni tərəfinin yaşayış məntəqələrini atəşə tutması səbəb olub. Düşmənin fəallığının qarşısının alınması və genişlənməsinə yol verməmək üçün komandanlıq cavab tədbirlərinin görülməsi barədə qərar verib.

Nazirliyin məıumatına görə, cəbhənin ən gərgin Ağdərə-Tərtər-Ağdam və Xocavənd-Füzuli istiqamətində yerləşən birliklər, artilleriya bölmələri və digər qoşun növlərinin birgə, əlaqəli fəaliyyəti nəticəsində qısa müddətdə ermənisilahlı bölmələrinə qarşı cavab tədbirləri həyata keçirilir.

İtki barədə açıqlama verilmir.

Müdafiə Nazirliyi Azərbaycan vertolyotunun vurulması barədə məlumatı da təkzib edib.-02D-

2016 Aprel 02 (Şəmbə) 10:13:22

Aprelin 2-nə keçən gecə Qarabağ cəbhəsinin Ağdam və Tərtər istiqamətlərində vəziyyət kəskinləşib. Azərbaycan Müdafiə Nazirliyi minaatanlardan və iriçaplı pulemyotlardan istifadə edilməklə atışmanın olduğunu bildirib.

Öz növbəsində Ermənistan Müdafiə Nazirliyi özünün ön mövqelərinin və şimal-şərq istiqamətində arxa hərbi hissələrin minaatan və artilleriya atəşinə tutulduğunu, cavab tədbirlərinin görüldüyünü bildirib. Qeyri-rəsmi mənbələrə görə, tərəflər zirehli texnika və aviasiyadan istifadə edirlər.

Azərbaycan Müdafiə Nazirliyi hələlik hərbi əməliyyatların miqyasını şərh etmir.

Lakin yerli mənbələr Azərbaycanın cəbhəyanı yaşayış məntəqələrinin ağır silahlardan atəşə tutulduğunu, dağıntıların olduğunu bildirir.

Saat 11:00-a yaxın erməni KİV-i bütün cəbhə boyunca irimiqyaslı hərbi əməliyyatların olduğunu bildirib. Azərbaycana məxsus vertolyotun vurulduğu,  həmçinin hər iki tərəfdən itkinin olduğu bildirilir.

Azərbaycan Müdafiə Nazirliyi hələlik şərh vermir.-02В-