Murad Adilovun barəsində hökmdən Strasburqa şikayət veriləcək(YENİLƏNİB)

Aprelin 22-də Ali Məhkəmədə AXCP-nin gənc fəalı Murad Adilovun kassasiya şikayətinə baxılması zamanı gəncin vəkilləri bəraətverici əsaslarla ona qarşı cinayət işinin dayandırılmasını xahiş ediblər.

Vəkil Yalçın İmanov qanunsuz narkotik maddə alverilə bağlı ittihamın hüququ əsasının olmadığını, “sübutlar”ın isə qanunsuz yolla toplandığını bildirib.

Vəkil qeyd edib ki, DİN Narkotiklərlə Mübarizə İdarəsi 2014-cü il avqustun 11-də Adilovların Sabirabad rayonundakı evinə və həyətyanı sahəsinə baxış barədə qərar çıxarıb. Lakin Adilovun şəxsən yoxlanması barədə qərar olmayıb.

Digər tərəfdən, saxlanma haqqında protokol olmadan şəxsi yoxlanmaya məruz qalıb. Baxış saxlanma yerindən 2 km. aralıda keçirilib.

“Hər şey sadədir. Əgər baxış saxlanma yerində aparılsaydı Muradın üzərindən narkotik maddə tapılmazdı.  Onun əllərini qandallayıb başqa yerə apardıqdan sonra narkotik maddəni üzərinə qoyublar”, - vəkil bildirib.

Sonra vəkil diqqəti ona yönəlidib ki, Adilovun üzərinə baxış ilə evində axtarış arasında vaxt iki saat çəkib.

“Bu müddətdə Murada təzyiq göstərilib ki, etirafedici ifadə versin. İmtina etdikdən sonra ona deyiblər: “Deməli, sənin  evindən narkotik maddə tapacağıq”, - vəkil vurğulayıb.

Evə baxış yalnız bir otaqda aparılb və polis “dərhal” narkotik maddə aşkar edib.

Sonra şahidlər ifadələrini təkrarlayıblar. Hətta orfoqrafik səhvləri eyni olan polislərin ifadələrini təkrarlayıblar.

Şahidlərdən biri, Elçin Atakişiyev narkoloji dispanserdə qeydiyyatdadır. O 2007-ci ildə narkotik maddə ilə əlaqədar həbs olunub və 3,5 il müddətinə mühakimə edilib. Bir ildən sonra gözlənilməz şəkildə azad edilib. Görünür, belə işlərdə şahid kimi istifadə etmək üçün lazım olub, vəkil qeyd.

Y.İmanovun sözlərinə görə, avqustun 12-dən 15-dək M.Adilov Baş Mütəşəkkil Cinayətkarlıqla Mübarizə İdarəsində saxlanılıb və işgəncələrə məruz qalıb.

Bakı təcridxanasında vəkil M.Adilovun müəssisəyə  daxil olarkən sağ budunda qançır olması barədə sənəd ala bilib.

Vəkil bildirib ki, Sabirabad polisində saxlandıqdan sonra Adilova açıq şəkildə deyiblər ki, onun həbsinə  qardaşı – AXCP mətbuat katibi, “Azadlıq” qəzetinin şərhçisi və “Azərbaycan saatı” teleproqramının aparıcısı Natiq Adilovun fəaliyyəti səbəb olub.

3-4 dəqiqəlik məşvərətdən sonra məhkəmə kassasiya şikayətinin təmin olunmadığını bildirib.

Vəkil Y.İmanov Turan-a bildirib ki, Ali Məhkəmənin qərarından Avropa İnsan Hüquqları Məhkəməsinə şikayət veriləcək. Artıq AİHM Adilovun işi üzrə qanunsuz həbs və işgəncə ilə bağlı iki şikayəti qəbul edib.—06C--

2016 Aprel 22 (Cümə) 11:48:27

Cümə günü Ali Məhkəmə Azərbaycan Xalq Cəbhəsi Partiyasının gənc fəalı Murad Adilovun kassasiya şikayətini təmin etməyib.

Məhkəmə M.Adilovun barəsində hökmü dəyişiklik etmədən qüvvədə saxlayıb.

M.Adilov 2014-cü ilin avqustunda külli miqdarda narkotik maddə satışında ittiham olunaraq sonradan 6 il müddətinə azadlıqdan məhrum edilib.

Əslində M.Adilov siyasi fəaliyyətinə görə və jurnalist qardaşı – Fransada fəaliyyət göstərən “Azərbaycan saatı” telekanalının aparıcısı Natiq Adilova təzyiq göstərmək məqsədilə  həbs edilib.

Belə ki, bu resursun müəllifləri korrupsiya və insan hüquqlarının pozulmasına görə Azərbaycanı kəskin tənqid edirlər.

Hüquq-müdafiə təşkilatları M.Adilovu siyasi məhbus hesab edirlər.—06С--