Müsavat Partiyasının başqanı Arif Hacılı Novruz Bayramı münasibəti ilə Azərbaycan xalqını təbrik edib

Təbrikdə deyilir:

“Əziz həmvətənlər!

Novruz bayramı münasibəti ilə Sizi ürəkdən təbrik edir, Sizə uzun ömür, can sağlığı, şəxsi həyatınızda xoşbəxtlik, işlərinizdə uğurlar arzulayıram.

Bahar Bayramı xalqımızın ən qədim və ən sevimli bayramlardan biridir.

Baharın gəlişi, təbiətin oyanması ilə bağlı olan bu bayram, həm də qədim ənənələrimizin qorunub saxlanması, nəsildən nəsilə ötürülməsi baxımından çox əhəmiyyətlidir. Xalqımızın kimliyini unutdurmaq, assimilyasiya etmək istəyənlər zaman-zaman tariximizi təhrif etmiş, başqa adət-ənənələrimiz kimi bu bayramımızı da unutdurmağa, mahiyyətini dəyişdirməyə çalışıblar. Xüsusilə sovet dövründə qadağan edilmiş Bahar Bayramımız Azərbaycanda gizli şəkildə qeyd edilirdi. Soydaşlarımız bir- birilərini gizli təbrik edir, bayram nemətlərini gizli hazırlayır, bayram şənliklərini gizli keçirirdilər.

İndi Novruz Bayramı ölkəmizdə təntənə ilə rəsmi qeyd edilən, xalqın ən sevimli bayramlardan biridir.

Təssüf ki, bu il də bayram günlərimizi dünyada tüğyan edən, bəşəri bəla olan pandemiya şəraitində qarşılayırıq. İnanıram ki, xalqımız bütün dövrlərdə olduğu kimi bu sınaqdan da güclü, sağlam və üzü ağ çıxacaq.

Bahar bayramı uzun illərdən sonra yenidən Milli Ordumuzun işğalçılardan azad etdiyi Qarabağ torpaqlarında qeyd edilir. Torpaqlarımızın böyük bir hissəsinin işğaldan azad edilməsi Vətənimizin, xalqımızın tarixində böyük, möhtəşəm hadisədir.

Bu böyük qələbəyə Azərbaycan Azadlıq Ordusunun rəşadətli mübarizəsi, xalqımızın ordu və böyük milli ideya ətrafında sıx birləşməsi, şəhidlərimizin canı və qazilərimizin qanı bahasına nail olduq.

Ərazi bütövlüyü uğrunda gedən döyüşlərdə neçə-neçə əsgər və zabitlərimiz qəhrəmanlıqla şəhid oldu və yaralandılar. Allahdan bütün şəhidlərimizə rəhmət, yaralı qazilərimizə isə şəfa diləyirəm.