Müsavat Partiyasının fəalı Xasay Fərzullaya qarşı cinayət işi məhkəməyə göndərilib

Bakı/17.07.17/Turan: Müsavat Partiyasının Masallı rayon təşkilatının sədri Xasay Fərzulla barəsində cinayət işi məhkəməyə göndərilib.

O, ehtiyatsızlıqdan zərərçəkmişə ağır bədən xəsarətləri yetirilməsinə gətirib çıxaran YNH törətməkdə ittiham olunur. Məhkəmənin hazırlıq iclası iyulun 18-nə təyin edilib.

Bu il aprelin 5-də Xasay Fərzulla öz maşını ilə Masallı rayonunun Bədəlan kənd ərazisində Rauf Tağıyevin qəfildən yola çıxması nəticəsində ona xəsarət yetirib. Bu barədə Turan-a vəkil Nemət Kərimli bildirib.

Vəkil Xasay Fərzullanın Rauf Tağıyevi dərhal xəstəxanaya çatdırdığını, Bakıda müalicəsi üçün bütün xərclərini çəkdiyini deyir. Hazırda zərərçəkənin durumunun yaxşılaşdığı bildirilir.

Bununla belə, araşdırmanın yekunlarına görə fəala qarşı Cinayət Məcəlləsinin 263.1.1 maddəsi ilə (ehtiyatsızlıq üzündən ağır xəsarət yetirmək) ittiham irəli sürülüb. Bu maddə 3 ilədək azadlıqdan məhrumetmə cəzası nəzərdə tutur.

Fərzulla özü istintaqın "işi siyasiləşdirdiyini" hesab edir.

"Boradigah kənd ərazi nümayəndəsi polisə mənimlə bağlı xasiyyətnamə verib. Orada mənim cəmiyyət həyatında müsbət rolumun olmamasını, Müsavat Pratiyasının Masallı təşkilatının sədri olmağımı xüsusi vurğulayıb. Bu, işi hüquqi müstəvidən uzaqlaşdırır", deyə Fərzulla qeyd edib.

Ekspertiza guya Fərzullanın qəzadan qaçmaq üçün "texniki imkanı olduğu" haqqında rəy verib. Amma əslində o, yol verilən sürətlə gedirdi, piyada isə özü yol hərəkəti qaydalarını pozub, qəfildən keçid üçün nəzərdə tutulmayan yerdə yola çıxıb, müdafiə tərəfi belə hesab edir.

Qeyd edək ki, hüquq-mühafizə və məhkəmə orqanları müxalifətçilərin və ya onların ailə üzvlərinin törətdikləri YNH hadisələrində həddindən artıq ciddilik nümayiş etdirirlər.

Vaxtilə Müsavat Partiyası başqanının müavini Tofiq Yaqublunun qızı Nigar Yaqubluya ölümlə nəticələnən avtomobil qəzasına görə, cinayət işi açılmışdı. Abşeron Rayon Məhkəməsinin hökmü ilə o, 2 il 6 ay müddətinə azadlıqdan məhrum edilmişdi. Baxmayaraq ki, yollarda qəzalara görə qadınları ümumiyyətlə cinayət məsuliyyətinə cəlb etmirlər.

Və ya başqa bir nümunə: zərərçəkmişin şikayətinin olmamasına baxmayaraq, Demokratik Qüvvələrin Milli Şurasının sədri Cəmil Həsənlinin qızı Günel Həsənli 1,5 il azadlıqdan məhrumetmə cəzasına məhkum edilib. O, ümumiyyətlə YNH törətməmişdi - qadın onun avtomobilinin qarşısında yıxılmışdı. Yaşlı qadının sürücüyə qarşı iradı da olmayıb.

DQMŞ üzvü Qurban Məmmədov da real azadlıqdan məhrumetmə cəzasına məhkum edilib. O, dayanacaq gözətçisini vurmaqda ittiham olunub, baxmayaraq ki, YNH-ni başqa sürücü törətmişdi. Həm də Məmmədov YNH-dən 9 ay sonra, o, hakimiyyəti tənqid etməyə başladıqdan sonra məsuliyyətə cəlb edilib. -06D-