Azərbaycan prezidentinin Latviyaya səfəri başlayıb

Bakı/17.07.17/Turan: Bu gün Azərbaycan prezidenti İlham Əliyevin Latviyaya birgünlük rəsmi səfəri başlayıb.

Rəsmi qarşılama mərasimindən sonra prezidentlər İ.Əliyev və R.Veyonisin əvvəlcə təkbətək, daha sonra geniş tərkibdə görüşü keçirilib. Danışıqlar başa çatdıqdan sonra tərəflər bir sıra hökumətlərarası sənədlər imzalayıblar.

İyunun 20-də Bakıda İqtisadi, Elmi-texniki və Mədəni əməkdaşlıq üzrə Azərbaycan-Latviya Hökumətlərarası Komissiyasının VII iclası keçirilib. İclasın yekunlarına görə tərəflərin Azərbaycan və Latviya arasında ticarət, investisiyalar, elm, təhsil, mədəniyyət, turizm, nəqliyyat, kommunikasiyalar, kənd təsərrüfatı, səhiyyə, energetika, regional inkişaf, ətraf mühitin mühafizəsi, əmək, məşğulluq və əhalinin sosial müdafiəsi, inşaat, ədliyyə sahələrində ikitərəfli əməkdaşlığı inkişaf etməyə və genişləndirməyə hazır olduğunu ifadə edən protokol imzalanıb.

Elə bu gün prezidentlər Latviya-Azərbaycan biznes forumunda iştirak edəcəklər. Axşam, səfər başa çatdıqda isə Azərbaycan prezidentinin şərəfinə rəsmi şam yeməyi veriləcək.

Mayın 30-da Azərbaycan parlamentinin spikeri Oqtay Əsədovu qəbul edən Latviyanın xarici işlər naziri Edqars Rinkeviçs deyib ki, prezident İlham Əliyevin bütün sahələrdə ikitərəfli əlaqələrin möhkəmləndirilməsinə böyük töhfə verəcək rəsmi səfəri Latviyada səbrsizliklə gözlənilir. XİN rəhbəri qeyd edib ki, səfər çərçivəsində imzalanması gözlənilən sənədlər iki ölkə arasında strateji tərəfdaşlıq üçün böyük əhəmiyyət daşıyacaq.

2016-cı ildə Azərbaycan və Latviya arasında ticarət dövriyyəsi cəmi 8,75 mln. dollar təşkil edib, bunun 7,9 mln. dolları Latviya tərəfin payına düşüb. -0-