«Müsəlman Birliyi» Hərəkatının üzvləri polisin işgəncələri barədə

Ağır Cinayətlər Məhkəməsində “Nardaran işi” üzrə proses davam edir. Müttəhimlər – “Müsəlman Birliyi” Hərəkatının üzvləri ifadələrlə çıxış edirlər.

Cümə axşamı beş nəfər çıxış edib. Onlar da öz liderləri Taleh Bağırzadə kimi bildiriblər ki, işgəncələr altında, ailə üzvlərinə qarşı təhdidlərlə bağlı etirafedici ifadələr veriblər.

Müttəhim Rasim Cəbrayılov bildirib ki,  polis işçilərindən biri onun gözləri qarşısında ölüb.

“Noyabrın 26-da günorta namazı vaxtı mən həyətdə idim. Təxminən 70-80 nəfər qara maskalı şəxs evi mühasirəyə aldı, bir qismi də evə hücum etdi. İçəri girən kimi atəş açmağa başladılar. Mənim əllərimi qandallayıb aparanda polislərdən biri gözümün qabağında yaralandı. Qara maskalılardan biri o birinə qışqırdı ki, “Zalım balası, neylədin. Bu, öldü ki!”.

Yaralı maskalını qucaqlarına götürüb apardılar. İki mebel maşını gətirmişdilər. Yaralı polisi sağdakı maşına qoydular. Məni isə soldakına. Silahın qundağı ilə vurub qaşımı partlatdılar. Fərahimi maşının içində döyə-döyə öldürdülər”, - R.Cəbrayılov bildirib.

Sonra Zakir Mustafayev ifadə verib:  “Əməliyyatçıların otağına aparıb məni stula qandalladılar. Mənə sabaha qədər vaxt verdilər ki, düşünüm. Deyim ki, guya Tale bizə silah verib, çevriliş hazırlayıb. Məni ailəmlə təhdid etdikləri üçün onların dediklərinə qol çəkdim. Sonra da məndən tələb etdilər ki, əməliyyat çəkilişlərində onların dediklərini deyim. Gözümün qabağında otaqda avtomat darağı və qumbaranı götürüb apardılar. Mən həmin silahları basdırdıqları yeri göstərib onları “tapmaq” göstərişi verildi. Maştağada hasarın yanında silahın basdırıldığı yeri mənə göstərib dedilər ki, get ordan çıxar. Bütün bunları kameraya çəkdilər”.

Hərəkatın digər üzvü Aqil İsmayılov deyib ki, ilk həbs edilənlərdən biri olub. Həbs olunanların aparıldığı mebel maşınında onu da döyüblər. “Əllərim bağlı olduğu halda başıma avtomat sıxdılar. Maşının içində silahın qundağı ilə bizə haradan gəldi vururdular. Fərahimə o qədər vurmuşdular ki, dubinka əyilmişdi. Onu döyə-döyə vəhşicəsinə qətlə yetirdilər. Talehi maşında o qədər vurdular ki, artıq səsi çıxmırdı. Həkim mənə baxanda ona dedilər ki, bunun burnunu kəs”,- müttəhim bildirib.

Sonra Ramin Sarıyev ifadə verib: “Əkbərin sinəsindən vurdular. Onun maşında qollarını və ayaqlarını sındırdılar. Məni və digərlərini maşında döydülər.  Rafael və Əkbərin maşında cəsədi var idi. Fərahimi də döyüb öldürdülər”.

  Müttəhim Əli Nuriyev isə deyib ki, dodağına 4 tikiş vurublar, alt və üst dişlərini sındırıblar.

Müttəhimlər  etirafedici ifadələrdən imtina edərək istintaqı onlara işgəncə verməkdə ittiham ediblər.

Onlar silah saxlamaq, hakimiyyəti ələ keçirməyə hazırlaşmaq kimi ittihamları rədd edərək hər zaman dinc, sivil mübarizə metodlarına tərəfdar olduqlarını bildiriblər. 

Proses davam edir.

Müttəhimlərin çıxışlarını şərh edən Demokratik Qüvvələrin Milli Şurasının sədri Cəmil Həsənli polis və hakimiyyətin metodunu “dəhşət” adlandırıb.

“ Mən belə istintaq əməllərinə, belə amansız işgəncə faktlarına alman faşizmi və 1937-ci ilin sovet repressiya tarixini öyrənərkən rast gəlmişəm. Lakin bir şeyi nəzərə almaq lazımdır ki, həmin dövrdə həm Almaniyada, həm də SSRİ-də müstəntiqlərin işgəncə yolu ilə ifadə almalarını qanuniləşdirmişdilər. Nardaran işi ilə bağlı istintaq zamanı təqsirlndirilən şəxslərə qarşı verilən amansız işgəncələr isə cinayət əməlidir”, - C.Həsənli bildirib.

* Xatırladaq ki, 2015-ci il noyabrın 26-da Nardaranda keçirilən xüsusi əməliyyat zamanı 6 nəfər, o cümlədən 2 polis işçisi həlak olub. İş üzrə 70 nəfər, əsasən “Müsəlman Birliyi” Hərəkatınn üzvləri və tərəfdarları məsuliyyətə cəlb olunub. Onlar CM-in bir sıra maddələri: konstitusiya quruluşunun zorla dəyişdirilməsinə cəhd, mütəşəkkil silahlı qrup yaratmaq və s. ilə ittiham olunurlar.

AXCP sədrinin müavini Fuad Qəhrəmanlı dövlət əleyhinə, kütləvi iğtişaşlara çağırışda, dini ədavətin qızışdırılmasında itiham olunur.-02D-