Media-icmal 05.08.2016

Müstəqilliyin təminatçısı- ordu       

“Azərbaycan” qəzetində dərc edilən “Ordu müstəqilliyimizin təminatıdır” sərlövhəli (http://www.azerbaijan-news.az/index.php?mod=3&id=102358) məqalədə ordu quruculuğunun zəruri olması barədə söhbət açılır.

Azərbaycanı Cənubi Qafqazın lider dövləti, sabitlik adası adlandıran müəllif  ölkədə iqtisadi inkişafla yanaşı, ciddi ordu quruculuğunun getdiyini də bildirir. Müəllif deyir ki, iqtisadi inkişaf ordunun müasir silahlarla təmin olunmasına hərtərəfli şərait yaradır. Müəllif bildirir ki, Ermənistan tərəfdən Azərbaycan ərazilərinin işğal faktı, xaricdən ola biləcək təhdidlər ordunun daim güclü durumda olmasını zərurətə döndərir.

Müəllif hesab edir ki, Azərbaycan ordusu həm təchizat, həm də döyüş qabiliyyəti baxımından dünyanın güclü orduları sırasındadır, bölgənin isə ən güclü ordusudur: “Ötən il dünya ölkələrinin güclü ordularının reytinqini açıqlayan “Global Firepower” təşkilatının siyahısında 106 ölkə yer almışdı. Ümumilikdə 50 faktor əsasında tərtib olunan siyahıda Azərbaycan ordusu 50-ci yerdə qərarlaşmışdı”.

Müəllif ordunun daim güclü durumda olacağı ilə bağlı dövlət başçısı İlham Əliyevdən sitat gətirir: “Hərbi potensialımızın gücləndirilməsi prioritet olaraq qalacaq. Aprel hadisələrindən sonra çox ciddi əlavə tədbirlər görülüb. Bizim döyüş qabiliyyətimiz böyük dərəcədə artıb, daha da artacaq. Biz ən müasir texnika, silah-sursat alırıq”.

Məqalədə ordunun inkişaf etməsi və güclənməsi xalqın xoşbəxt həyatının təminatı adlandırılır, bu gün həmişəkindən güclü olan ordunun işğal altında olan torpaqları azad etmək üçün hər an döyüş əmri gözləməsi xüsusi olaraq vurğulanır.

“Stalin”çi işgəncələr günümüzdə

“Azadlıq” qəzeti  “Belə işgəncələr Hitler və Stalin rejimlərində olub” sərlövhəli (http://www.azadliq.info/150350.html) məqalədə Demokratik Qüvvələrin Milli Şurasının sədri, professor Cəmil Həsənlinin Facebook səhifəsində “Nardaran işi” ilə bağlı prosesdə təqsirləndirilən şəxslərə verilən işgəncələrə münasibətini ifadə edir.

C. Həsənli işgəncələrlə bağlı deyir: “Bu iş üzrə təqsirli bilinən 5 nəfər ifadə verdi, doğrusu eşitdiklərim dəhşətli idi, belə istintaq əməllərinə, belə amansız işgəncə faktlarına alman faşizmi və 1937-ci ilin sovet repressiya tarixini öyrənərkən rast gəlmişəm”.

C.Həsənli müttəhim Rasim Cəbrayılovun keçən il noyabrın 26-da “Nardaran hadisələri” zamanı qətlə yetirilən polislərdən birini digər polis yoldaşının güllələdiyini, digərini yaraladıqlarını bildirir. R.Cəbrayılov qan içində olsa da bu şəkildə dindirildiyini deyir.  

Müttəhim Zakir Mustafayev qandallanmasını, ailəsilə hədələnməsini bildirir.

Müttəhim Adil İsmayılov özü təslim olmasına baxmayaraq, polis idarəsinə aparılarkən amansız işgəncələrə məruz qaldıqlarını nəzərə çatdırır. A.İsmayılov Fəraim adlı şəxsin yolda gətirilərkən maşının içndə döyülməkdən öldürüldüyünü nəzərə çatdırıb. A.İsmayılov Rafael və Əkbər adlı şəxslərin də məhz yolda döyülmə nəticəsində öldürüldüklərini deyir. Müttəhimlər bu işgəncələr altında ifadə verdikləri üçün məhkəmə prosesində ondan imtina etdiklərini bildiriblər. 

Bütün bu işgəncə faktlarını sadalayan C.Həsənli deyir: “Bir anlığa diqqət yetirin: bütün bunları əməliyyat qrupu və istintaq orqanları dövlət adından həyata keçirib. Hələ ki rəsmən respublika olan bir dövlətin adından”.

Dağıdılan Bakı tarixi 

“Exo” qəzeti “Sökmək, amma tikməmək” sərlövhəli məqalədə (http://www.echo.az/article.php?aid=103579) ekspertlərlə Bakının memarlıq abidələrinin sökülməsini araşdırır.

Müəllif Bakıda Şərq və Qərb arxitektura məktəblərinin nümunələrinin yaradıldığına görə şəhəri dünyanın üçün cəlbedici etdiyini deyir.

Bakıda son söküntülər zamanı Arxitektorlar İttifaqı binasının yaxınlığında yerləşən “Ağa Bala Quliyevin evi”nin sökülməsinin sosial şəbəkələrdə ciddi müzakirə obyekti olduğu vurğulanır. Müəllif bu söküntülərun baş verməsi səbəblərini ekspert Nəriman Ağayevin belə izah etdiyini deyir: Təəssüf ki, bizdə tarixi bina və abidələrin dəyərləndirilməsi və monitoirnqi aparılmır. Düzdür, Bakıda bəzi binaları bərpa ediblər, amma bu, yetərli deyil. Bunun üçün ilk növbədə mövcud olan tarixi binaların dəyərləndirilməsi aparılmalıdır. Daha sonra dövlət bərpa işlərinə maliyyə vəsaiti ayırmalıdır”.

Belə analoji situasiya təkcə ölkənin  əyalətlərində yox, habelə paytaxtda da mövcuddur. Adətən dünyada belə binaların pasportlaşdırılması təcrübəsi tətbiq edilir, bizdə isə belə təcrübə yoxdur.

Müstəqil Arxitektorlar Assosiasiyasının prezidenti Zemfira Budaqova isə Bakıdakı arxitektura və tarixi abidə əhəmiyyəti olan binalarla bağlı hər hansı kompleks tədqiqat işlərinin aparılmadığını deyir. Onun dediklərinə görə, belə tədqiqatlar əvvəllər aparılardı. Z.Budaqova onu da bildirib ki, tarixi əhəmiyyətli binaların dəyərləndirilməsində tarixçilər, coğrafiyaşünaslar və arxitektorlar birgə iştirak etməlidirlər, amma buna əməl edilmir. 

Sökülən mülklər, ödənilməyən kompensasiyalar

“Novoye Vremya” qəzeti “Bizim problemlər” sərlövhəli məqalədə isə (http://www.novoye-vremya.com/w63921/.../#.V6P4QRHr34g) söküntülər zamanı mülkiyyət hüququnun pozulması hallarını ekspertlərlə araşdırır.

Belə ki, qəzet dəmiryolu vağzalı ətrafında söküntülərin başlandığını, amma yenə də mülkiyyət sahibləri olan iş adamlarına kompensasiya ödənilməməsinə diqqət çəkir.

Müəllif deyir ki, mülkiyyət sahiblərinin çoxu bu söküntülərlə razı deyil, obyektlərin tikintisi qanunidir, Bakı Şəhər İcra Hakimiyyətinin tələblərinə uyğun tikilib. Amma kompensasiya ala bilmək üçün sahibkarı öncə obyektini sökməyə vadar edirlər, sonra isə kompensasiya ödənilmir. Müəllif yazır ki, hətta şəhər meriyası kompensasiyaların ödənilməsilə bağlı məhkəmə qərarlarını belə rədd edir. “Əmlak bazarının iştirakçıları” Birliyinin sədri Ramil Osmanlı bu haqda deyir: “Obyektlər sökülməzdən öncə hansısa xüsusi tədbir görməyə ehtiyac yoxdur, düşünülmüş qiymət siyasəti olsa yetərlidir. Bakıda bu siyasət düzgün icra edilmir. Əər kompensasiya real bazar dəyərinə uyğun olarsa heç bir narazılıq olmaz”. 

Ekspert hazırda kompensasiya adına ödənən məbləğlərin bu mənadan uzaq olduğunu deyir. Dövlət başçısı İlham Əliyevin sərəncamına əsaslanan ekspert bildirir ki, həmin sənədə əsasən əmlak sahiblərinə bütün əmlakın bazar dəyəri və üstəlik 20 faiz kompensasiya ödənilməlidir. R.Osmanlı uyğun rəsmi qurumların buna əməl etmədiklərini vurğulayır. 

Müəllif yenə də ədalətli  kompensasiya veriləcəyinə ümidli deyil, buna görə də yenə də sahibkarların zərərə düşəcəyini bildirir.

Sonu görünməyən dələduzluq “yolu”

“BizimYol” qəzeti “Fırıldaqçı “şirkət” iş axtaran tələbəni belə soydu” sərlövhəli (http://www.bizimyol.info/news/82382.html) məqalədə ölkədə işə düzəltmək adı ilə insanlara qarşı dələduzluq edən “qurumlar”ın ortaya çıxması tənqid edilir.

Müəllif qeyd edir ki, belə aldadılmağa məruz qalanlardan biri Memarlıq və İnşaat Universitetinin II kurs tələbəsi Cavid Vəliyevdir.

Tələbələrə yay tətili zamanı təqaüd verilmədiyini bildirən şikayətçi deyir ki, maddi ehtiyacını qarşılamaq üçün İnternetdə iş axtarmağa başlayıb.  İnternetdə ünvanını göstərməyən işədüzəltmə şirkətinin nömrəsini tapıb zəng edib.

Müəllif yazır ki, ofis “Sovetski” tərəfdə imiş. Tələbə mühafizəçi işləmək istədiyini söyləyib, şirkətin Zöhrə adlı əməkdaşı "Caspian Service" MMC-də işləyəcəyini söyləyib. Mühafizəçi forması üçün öncədən 150 manat ödəniş etməli olduğunu bildirib: “Təqaüd almadığım üçün həmin pulu borc alıb işədüzəltmə şirkətinə verdim. İki aya yaxın vaxt keçsə də mənə nə iş təklif olundu, nə də pulum qaytarıldı. Borc verən isə pulunu istəyir. Mən çətin vəziyyətlə üzləşmişəm”.

Müəllif yazır ki, tələbə qarşılaşdığı problemlə bağlı Vergilər Nazirliyinə müraciət edib, fakta nazirliyin  hüquqi qiymət verəcəyini söyləyib.

Müəllif bildirir ki, "Caspian Service" MMC-nin hüquqşünası Vüsal Kişiyev isə fakta belə münasibət ifadə edib: “Təəssüf olsun ki, işədüzəltmə şikətləri "Caspian Service"-in adından istifadə edərək vətəndaşları aldadır. Bizdə vakansiya yoxdur”.